17
लड़ई-झगड़ा घरे चाउर-भाजा खातो पलटा,अस्तिर ने बसुन कोदा-कोसरा खातोर नंगत आय।
2 आया-बुआ के लाज पड़ातो बेटा उपरे बुद बीता कमेया हक संगायदे,
आउर आपलो मालिक चो निज बाटा ले हुनके बले बाटा मिरेदे।
3 रूपा के परखतो काजे कुठाली आउर सोन काजे भाटी†,
मानतर जहोवा, मनुक चो मन के परखेसे।
4 अडरा लोग, दुसट चो गोटमन के धियान ले सुनेसोत,
आउर फंदी मनुक, ठगा-फारसी गोटमन के कान डेरुन सुनेसे।
5 गरीब चो हांसी-खेली करु बीता, हुनके बनाउ के बदी देयसे,
आउर कोचई बिपती बेरा हरिक होउ बीता, डंड पायदे ची।
6 नाती-पुती, डोकरा-डोकरीमन चो मुकुट आत,
आउर आया-बुआ, पिलामन चो मुकुट आत।
7 मूरक, नंगत गोट गोटेयातोर नी फोबे,
उसने ची राजा, फंद गोट गोटेयातोर नी फोबे।
8 घूस, देउ बीता काजे मोहातो मनी-पकना असन आय,
हुन कहांय गेले बले हुनचो काम बनेसे।
9 दुसर चो पाप के खेमा करु, हुनके मीत बनायसे,
मानतर हुनी गोट के घन-घन गोटेयातो बीता, मीतमन चो मंजी झगड़ा उबजायसे।
10 गोटोक हार दागा दिले, समज बीता के खुबे फरक पड़ेसे,
मानतर सव हार मार खादले बले, भकवा के काई फरक नी पड़े।
11 दुसट, एड़जा रउक मन करुआय,
एईकाजे हुनमन चो बिरुद कटुर दूत के पठायदे।
12 कोनी भकवा के, भकवा बुता करतोदांय भेटतो पलटा,
आपलो पिला हजालो भालु के, भेटतोर नंगत आय।
13 जोन बले भलई चो पलटा अडरा करेदे,
हुनचो घर ले अडरा नी गुचेदे।
14 झगड़ा चो मूर, बांध चो काना असन आय,
एईकाजे झगड़ा बाड़तो ले आगे हुनके छांडतोर नंगत आय।
15 जोन कोनी दुसट के दोख नोहलोर आउर धरमकारी के दोसी आय बलेसे,
हुन दुनो बुता के जहोवा घिनियाउआय।
16 भकवा चो हाथे बुद घेनतो काजे धन रले काय नफा?
हुन तो हुनके मुरे मन नी करे।
17 मीत अमदेया मया करुआय,
आउर बिपती बेरा साहरा देतो भाई बनुआय।
18 मूरक आपलो घर-लग चो लोग काजे जुमे होउआय,
आउर दुसर चो बाद मारलो तीजमन के भोरुन देउआय।
19 ओधरम करु बीता, लड़ई-झगड़ा के मन करेसे,
ढोंग दखाउ बीता, आपलेई नास काजे मसागत करेसे।
20 कपटी चो भलई नी होए,
आउर टेचराहा बिपती ने पड़ेसे।
21 मूरक बेटा ले बुआ, दुख ची पायदे,
भकवा बेटा ले, बुआ केबई हरिक नी होयदे।
22 हरिक मन ने रतोर नंगत उपाय आय,
मन टुटलोने, हाड़ामन सुकुन जायसे।
23 दुसट मनुक नियाव नसातो काजे,
घूस धरेसे।
24 समज बीता, बुद के डगरायसे,
मानतर भकवा, मंजपुर चो लापी-लापी देसमन बाटे उनारु रयसे।
25 भकवा बेटा किरता बुआ मुरमुरा होयसे,
आउर जनम दिलो आया के तकलीस होयसे।
26 धरमकारी के बेरपेला डंड देतोर,
आउर सोज लोग के डाटा-टेवा करतोर नंगत नोआय।
27 बुद बीता धीरान ले गोटेयायसे,
समज बीता चो मन अस्तिर ने रउआय।
28 ओगाय रले मूरक के बले बुद बीता समजसोत,
आउर टोंड के आपलो हक ने संगाले, समज बीता बलसोत।