नीतिबचन 18

जोन आपलेई मन-इछा पुरा करतो काजे आपलो लोग ले अलगे होयसे,

हुन सपाय बरन चो नंगत बुद के बईर करेसे।

2 मूरक, समज चो गोटमन के मने नी करे,

मानतर आपलेई मन चो गोट सांगतो काजे हरिक होउआय।

3 दुसट बुता ले लाज पड़ुक होयदे,

बदी दिले, इजित जाउआय।

4 मनुक चो गोट, गड़िया पानी

आउर बुद चो मूर, बोहतो नंदी चो पजरा आय।

5 दुसट चो पाटेया होतोर,

आउर धरमकारी चो हक मारतोर नंगत नोआय।

6 भकवा चो टोंड झगड़ा उबजायसे,

आउर आपने के मार खातो लाईक बनायसे।

7 आपलो टोंड किरता भकवा सत्यानास होयसे,

हुनचेई गोट हुनचो काजे फांदा होयसे।

8 खुसुर-फुसुर करुमन चो गोट, मीठ खादी-पीदी असन

पेटे जीरुन जायसे^†।

9 ठगरा,

उबागरी चो भाई आय।

10 जहोवा चो नाव, चमकट भाड़ा आय,

धरमकारीमन हुनचो सरन ने पराते जाउन बिपती ले बाचुआत।

11 सवकार चो धन हुनचो काजे बरसक भाड़ा आय^†

आउर हुनचो नंजर ने, गोटोक डेंग ओवासी असन आय।

12 नास होतो ले आगे, मनुक चो मन गुमान करेसे

आउर मान पावतो ले आगे, आपने के नानी करेसे^†।

13 गोट सुनतोले आगे गोटेयातो बीता भकवा आय,

हुनचो इजित जायदे।

14 मनुक बेमार रले, हुनचो मन हुनके समालेसे,

मानतर मन टुटलोने, हुन आपनेके कसन ने समालेदे?

15 समज बीता चो मन गियान पायसे,

आउर बुद बीता चो कान, गियान चो गोट डगराते रयसे^†।

16 भेंट, मनुक काजे बाट उगाड़ेसे,

आउर हुनके बड़े लोगमन चो पुरे अमरायसे।

17 नियाव-दाव ने दुसर पाट बीता के नी परखतले,

आगे बलतो बीता चो गोट सत लागुआय।

18 चिटी निकराले, झगड़ा बुतुआय

आउर बलेयारमन चो लड़ई सरुआय।

19 रीसालो भाई के मना-बुजा करतोर, चमकट सहर के जीततो ले बले आगर खट-खट आय,

भाई-भाई झगड़ा होतोर, भाड़ा भिती सहर चो तारा-कुची दिलो कपाट असन आय।

20 मनुक आपलो नंगत गोट चो फर ले पेट भोरेसे,

आउर हुनचो गोट ले मिरलो नंगत फर ले, भलई पायसे।

21 जीवना आउर मोरना दुनो जीब चो हक ने आसे,

आउर जसन हुनके बावरसे, उसने पलटा पावसे।

22 जोन मनुक, नंगत बायले के बिया होलो, हुन खुबे नंगत तीज मिरालो,

जहोवा हुनचो ले हरिक आसे।

23 गरीब गाग गगरीही होउन गुहारेसे,

मानतर सवकार दागा देउन बलेसे।

24 खुबे मीत रले, मीत रतो ढोंग दखायसोत,

मानतर भाई ले बले आगर साहरा करतो मीत रयसे।