16
मनुक आपलो मने उआट करेसे,मानतर जहोवा बाटले ची हुन पुरा होयसे।
2 मनुक के आपलो सपाय चलनी-बुलनी सुद लागुआय,
मानतर जहोवा मन चो बिचार के परखुआय†।
3 आपलो बुतामन जहोवा चो हाथे सोपुन देस,
तेबे तुचो उआटमन पुरा होयदे।
4 जहोवा, सपाय के खास लागीन बनालोसे,
आउर दुसट के डंड भोगतो काजे बनालोसे।
5 गुमानीमन के जहोवा घिनियाउआय,
मय सत बलेंसे, हुनमन के डंड मिरेदे ची†।
6 दया आउर सत ले ओधरम चो खेमा होयसे,
जहोवा के डरुन चलतो लोग, अडरा बुता ले बाचुन रयसोत।
7 जहोवा कोचई चलनी-बुलनी के मन करेसे जाले,
हुनचो बयरी के बले हुनचो मीत बनायसे।
8 ओनियाव करुन खुबे धन कमातो पलटा,
धारनिक बुता करुन खिंडिक धन पावतोर नंगत आय।
9 मनुक आपलो मने उआट बनायसे,
मानतर जहोवा ची हुनचो डांहका के चमकट करेसे।
10 राजा, महापरभु दिलो हक ले हुकुम निकरायसे,
हुन सत-नियाव ची करेदे।
11 सत किलो-काटा आउर सत नाप के, जहोवा मन करेसे,
झोरा ने रतो सपाय सत किलो-बाट हुनचेई बाटले आय।
12 राजामन, दुसट बुता के घिनियाउआत,
कसनबलले हुनमन चो आसनगादी सत-धरम ले चमकट रयसे।
13 धारनिक गोटेयातो लोग ले राजा हरिक होउआय,
आउर सत गोटेयातो लोग के मया करुआय।
14 राजा चो रीस, मोरना चो दूत कटार आय,
मानतर बुद बीता हुनके सितराउआय।
15 राजा तुचोले हरिक आसे जाले, जीव बाचलो कटार आय,
आउर हुनचो हरिक, सरासरी चो बरसा-पानी असन लोगमन के सितराउआय।
16 बुद मिरतोर, सोन मिरतोले बले नंगत आय,
आउर समज मिरतोर, रूपा ले बले आगर नंगत आय।
17 सोज लोग, अडरा बाट के छांडुन जाउआत,
चेत ने चलनी-बुलनी करु आपलो जीव चो रखेया करेसे।
18 मनुक, सत्यानास होतो ले आगे टडम दखायसे,
आउर धोका खातो ले आगे गुमान करेसे।
19 गुमानीमन संगे झीका-उड़मा करलो धन के बाटतो पलटा,
गरीबमन संगे आपनेके नानी करुन रतोर नंगत आय।
20 बचन के मानतो बीता चो बाड़ती होयदे,
जहोवा उपरे भोरसा संगातो बीता धन-धन आय।
21 जेके बुद आसे, हुनके समज बीता बलसोत,
नंगत गोट-बात ले गियान बाड़ेसे।
22 बुद बीता काजे बुद, जीवन चो पजरा आय,
मानतर मूरक, आपलो मूरक बुद ले डंड पायसे।
23 बुद बीता चो टोंड ले बुद चो गोट निकरेसे,
आउर हुनचो गोट ले गियान बाड़ेसे।
24 मीठ गोट, ओंडार तेल भोरलो पोरी असन आय,
हुन जीव के हरिक आउर देहें-पांय के चेंग-चेंगा करेसे।
25 कोनी-कोनी बाट मनुक के नंगत लागुआय,
मानतर हुनचो सरासरी ने मोरना आसे†।
26 भूतियार, भूक किरता बुता करेसे,
हुनचो पेट ची, हुनके बुता करुक उकसायसे।
27 ओधरमी मनुक, अडरा उआटमन करते रयसे,
हुनचो गोट, ढिग-ढिगतो आईग असन आय।
28 टेचराहा, झगड़ा उमड़ाउआय,
खुसुर-फुसुर करु, मीतमन मंजी बईर उबजाउआय।
29 उबढंगरी मनुक, घर-लग चो लोग के फुसियाउन
अडरा बाट ने नेयसे।
30 आंईक मारु, अडरा उआट करुआय,
आपलो ओट चाबी होउ, अडरा बुता करुआय।
31 पाकलो चूंदी मयमा चो मुकुट आय,
हुन धारनिक बाट ने हिंडतो लोग के मिरेसे।
32 धीरे ले रीस होउ, बड़े बीर ले नंगत आय,
आउर मन के आपलो हक ने करु, सहर के जीततो बीता ले नंगत आय।
33 लोग चिटी पकाउआत,
मानतर हुनचो फासला निकरतोर जहोवा बाटले आय।