बुद चो हागदेतोर
9
बुद आपलो घर बनाली,हुनचो सात ठन खमामन गाड़लोर आसे*।
2 हुन आपलो पसु के मारुन भोज तियार करली,
आउर आपलो अंगुर रस ने मसला मिसाली*।
3 हुन लोगमन के हागदेतो काजे आपलो कमेयीनमन के पठाली;
बुद, सहर चो डेंग ठान ले हागदेयसे,
4 “ए सादा लोगमन बोहड़ुन ए बाटे इआ!”
आउर मूरकमन के असन बलेसे,
5 “इआ, मोचो बनालो भोज खाहा,
आउर मसला मिसालो अंगुर रस के खाहा।
6 तुमी एके खाउन-पीउन भकवा बुता के छांडुन सादा जीवना जिया,
आउर समज चो बाट ने सरसरा हिंडा।”
7 हांसी-खेली करु, आपने के दागा देउ के लाज पड़ायसे,
आउर दुसट के दागा दिले, दागा देउ बदी पायसे।
8 हांसी-खेली करतो बीता के दागा नी देस, नोहले हुन तुचेई ले बईर करेदे,
बुद बीता के दागा देस, हुन तुके मया करेदे।
9 बुद बीता के सिखिया देस हुन, आउर जुगे बुद बीता होयदे,
धरमकारी के सला देस, हुन आगर गियान पायदे।
10 जहोवा के डरुन चलतोर, बुद चो मूर आय†,
आउर सपाय ले पवितर महापरभु के जानतोर ची समज आय।
11 मोचो बाटले तुचो उमर बाड़ेदे,
आउर तुय खुबे बरक जीव रसे।
12 तुय बुद बीता आस जाले, बुद चो नफा तुके ची मिरेदे,
तुय हांसी-खेली करतो बीता आस जाले, तुय खुदे डंड भोगसे।
मूरक चो हागदेतोर
13 मूरक बायले, चिड़लीन आय,
हुन भकवा आय, आउर काई के नी जाने।
14 हुन, आपलो घर-दुआरे,
आउर सहर चो डेंग ठानमन ने आपलो गादी ने बसुन रउआय,
15 बाटे-बाटे हिंडतो लोगमन के
हुन असन बलुन हागदेयसे,
16 “ए सादा लोगमन, बोहड़ुन ए बाटे इआ!”
आउर मूरकमन के असन बलेसे,
17 “चोरलो पानी मीठ लागुआय,
लुकुन खादले, खादी-पीदी नंगत लागुआय।”
18 हुनमन नी जानोत, हुता कितलो लोगमन मोरलासे,
आउर हुनचो नेवतलो लोग पतालपुरे अमरलासे।