सुलेमान चो नीतिबचन
10
सुलेमान चो नीतिबचन।बुद बीता बेटा, आपलो बुआ के हरिक करेसे†,
मानतर भकवा बेटा ले आया मुरमुरा होउआय।
2 अडरा बुता ले कमालो धन काई काम नी देये,
मानतर धारनिक जीवना, मोरना ले बचाउआय†।
3 धरमकारी के जहोवा भूके रउक नी देये,
मानतर दुसट चो मन-इछा पुरा होउक नी देये।
4 ठगरा, गरीब होउआय,
मानतर मसागत करु सवकार होउआय।
5 बुद बीता बेटा कटई बेरा धान-पान रुंडाउआय,
मानतर ठगरा बेटा कटई बेरा भारी-झूमा ने रउन लाज पड़ुआय।
6 धरमकारी के खुबे बर मिरेसे,
मानतर दुसट चो टोंड आपलो उबागरी उआटमन के लुकायसे।
7 धरमकारी के सूरता करुन लोग बर पायसोत,
मानतर दुसट चो नाव मेटुन जायसे।
8 बुद बीता हुकुममन के मानुआय,
मानतर मूरक गोट गोटेयातो बीता सत्यानास होयदे।
9 जेचो चलनी-बुलनी चोखा आसे, हुन डर नोहलोर रयसे,
मानतर कपटी चो सपाय बुतामन दखा देयदे।
10 आंईक-मारु बीता ले, लोग तकलीस होउआत,
मानतर खर दागा देउ बीता ले, लोग अस्तिर पाउआत।
11 धरमी चो टोंडे जीवन चो पजरा आय,
मानतर दुसट चो टोंड आपलो उबागरी उआटमन के लुकायसे।
12 बईर, झगड़ा उबजाउआय,
मानतर मया सपाय पाप के ढाकुआय†।
13 समज बीता चो टोंडे बुद रयसे,
मानतर मूरक बीता चो पाट काजे कोड़ा आसे।
14 बुद बीता गियान के रुंडायसे,
मानतर मूरक बीता चो गोट बिपती ने पाड़ेसे।
15 सवकार चो धन हुनचो काजे बरसक भाड़ा आय†,
आउर गरीब आपलो नानागती किरता सत्यानास होयसे।
16 धरमकारी चो मसागत, नंगत जीवना काजे आय,
मानतर दुसट चो कमई ले पाप बाड़ेसे।
17 जोन सिखिया के मानेसे, हुन जीव चो बाट ने हिंडेसे,
मानतर जोन दागा के हेला समजेसे, हुन जीव चो बाट के भूलकदे।
18 मने बईर संगाउ बीता फंद गोेटेयाउआय,
आउर खुद खाउ बीता मूरक आय।
19 टाबरा-टाबरी ले ओधरम बाड़ेसे,
मानतर बुद बीता धीरान ले गोटेयायसे।
20 धरमकारी चो बचन निरवा रूपा असन आय,
मानतर दुसट चो गोट काई मोल चो नीआय।
21 धरमकारी चो बचन किरता खुबे लोग चो जीवना चलेसे,
मानतर मूरक बीता, बुद नी रलो किरता मोरुन जायसे।
22 जहोवा चो बर ले ची धन मिरेसे,
आउर बर संगे हुन, तकलीस नी देये।
23 पाप करतोर मूरकमन के हांसी-खेली असन लागुआय,
मानतर समज बीता नंगत बुद ले हरिक ने रयसे।
24 दुसटमन जोन बिपती के डरुआत, हुनमन उपरे हुनी बिपती पड़ुआय,
मानतर धरमकारीमन चो मन-इछा पुरा होउआय।
25 लेहरा-धुका ईली जाले, दुसट लोग नी बाचोत,
मानतर धरमकारीमन अमदेया चमकट रयसोत।
26 जसन दात काजे टिरका आउर आंईक काजे कुमला आय,
उसने ची ठगरा बीता ले, पठाउ बीता असकट होउआय।
27 जहोवा के डरुन चललोने, खुबे बरक जीव रउक होउआय,
मानतर दुसटमन चो जीवना खिंडिक ची दिन काजे आय।
28 धरमकारीमन चो आसा पुरा होउआय आउर हुनमन हरिक ने रउआत
मानतर दुसटमन चो आसा टुटेसे।
29 जहोवा चो बाट, चोखा चलनी-बुलनी लोग काजे भाड़ा आय,
मानतर दुसटमन हुनचोले सत्यानास होदे।
30 धरमकारी अमदेया चमकट रदे,
मानतर दुसटमन मंजपुर ने बसापत करुक नी सकदे।
31 धरमकारी चो टोंड ले बुद चो गोट निकरेसे,
मानतर कपट गोटेयाउ चो जीब के काटदे।
32 धरमकारी समजुन-बुजुन मया चो गोट गोटेयाउआय,
मानतर दुसट चो टोंड ले कपट गोटमन ची निकरुआय।