बुद चो बड़ाई
8
काय, बुद नी हागदेयसे?काय, समज बड़े राग ले नी गोटेयायसे?
2 हुन, सड़क रेटे, डेंग ठानमन ने
आउर जोड़ानमन ने उबा रयसे;
3 हुन, सहर ने ओलतो डेवना लगे,
आउर कपाटमन लगे बड़े राग ले गोटेयायसे:
4 “ए मनुकमन, मय तुमके हागदेयंसे,
मोचो गोट सपाय लोगमन काजे आय।
5 ए सादा लोगमन, तुमी चलाक बना,
ए भकवामन, तुमी गियानी होआ।
6 मोचो सुना, कसनबलले मय नंगत-नंगत गोटमन सांगेंसे,
मोचो टोंड ले पतेयातो लाईक गोटमन निकरेदे;
7 मोचो सत गोटमन गोटेयायंदे;
मय अडरा गोटमन के घिनियाउआंय।
8 मोचो टोंड ले धारनिक गोटमन ची निकरुआय;
हुनमन ले गोटोक बले गुपातो नोहले कपट गोट नोआय।
9 (हुन गोटमन) समजतो लोग काजे सरसरा,
आउर बुद पावतो लोग काजे नंगत आय।
10 रूपा के नाई, मोचो सिखिया के धरा,
नंगत सोन चो पलटा गियान के धरा;
11 कसनबलले गियान, मनी-मुकतामन ले नंगत आय,
आउर मन भावतो सपाय तीजमन ले काई बले हुनचो कटार नीआय†।”
12 मय, गियान आंय, मय चलाक ने रयंसे,
मोचो लगे बुद आउर नंगत उआट बनातो समज आसे।
13 जहोवा के डरुन चलतोर ची, अडरा बुता के घिनियातोर आय,
गुमान, ढोंग, अडरा चलनी-बुलनी,
आउर कपट गोट के मय बईर करुआंय।
14 मोचो लगे नंगत सला आउर गियान बले आसे,
मोचो लगे समज आसे, आउर सकत बले आसे।
15 मोचेई किरता राजामन राज करसोत,
आउर राज करुमन सत-नियाव करसोत;
16 मोचेई किरता राजा, सवकार
आउर मंजपुर चो सपाय नियावकारीमन धरम ले राज करसोत।
17 जोन मोके मया करुआय, मय बले हुनके मया करुआंय,
जोन मोके मसागत ले डगराउआय, हुन मोके मिराउआय।
18 मोचो लगे धन आउर मान आसे,
अमदेया रतो धन आउर धारनिक बले आसे।
19 मोचोले पावलो नफा निरवा सोन ले,
आउर मोचो ले मिरलो कमई चोखा रूपा ले बले नंगत आय।
20 मय धरम चो बाट ने
आउर सत-नियाव चो बाट ने हिंडेंसे,
21 मोके मया करतो लोग के धन-माल देयंसे,
आउर हुनमन चो गदेयामन के भोरेंसे।
22 मय बुद के, जहोवा आपलो सपाय बुता चो मूर ने,
हुनचो बनालो सपाय तीजमन चो आगे ले जनमालोसे।
23 जुग चो आगे ले,
मंजपुर चो मूर चो आगे ले मोके बनालोसे।
24 जेबे गड़िया समदूरमन नी रला,
आउर पानी-पजरामन नी रला,
25 आउर बड़े-बड़े डोंगरीमन नी रला,
हुनचो आगे ले मय रयें।
26 जहोवा, भुंय आउर बेड़ा-खाड़ामन,
आउर मंजपुर चो धुरला-गोटी के बनातो ले आगे मोके जनमालोसे।
27 हुन, बादरी के चमकट करतो बेरा,
आउर गड़िया समदूर आउर बादरी चो संद बनातो बेरा मय रयें,
28 आउर उपरपुर के चमकट करतो बेरा
आउर गड़िया समदूर चो पजरा फुटतो बेरा,
29 आउर समदूर हुनचो हुकुम मानो बलुन
समदूर चो संद बनातो बेरा,
आउर हुन, मंजपुर चो पाया चो चीना लगातो बेरा,
30 मय कारिगिर असन हुनचो संगे रयें,
रोजे हुन मोचोले हरिक रये,
आउर मय अमदेया हुनचो पुरे हरिक ने रते रयें।
31 हुनचो बनालो ए संवसार ले मय हरिक रयें,
मय नर-मंजा ले हरिक रयें।
32 “एईकाजे एदांय, ए मोचो बेटामन, मोचो सुना†;
धन-धन आत हुनमन, जोन मोचो बाट के नी छांडोत।
33 सिखिया के सुना, आउर बुद बीता बना,
ए गोट के पाटसुना नी करा।
34 धन-धन आय हुन मनुक जोन मोचो सुनुआय,
आउर रोजे मोचो डेवना ने उबा रउआय,
आउर मोचो कपाटमन बाटे नंजराते रयसे।
35 कसनबलले जोन मोके पायसे हुन, जीव के पायसे,
आउर जहोवा हुनचो ले हरिक होयसे;
36 मानतर जोन मोचो बिरुद करेसे, हुन आपलेई नोकसान करेसे;
जोन मोके बईर करेसे, हुन मोरना के मया करेसे।”