7
ए मोचो बेटा, तुय मोचो गोटमन के मान,आउर मोचो हुकुममन के आपलो मने संगाव†।
2 मोचो हुकुममन के मान, तेबे तुय जीव रसे†,
मोचो सिखियामन के आपलो आंईक चो पुतरा असन रखेया कर;
3 हुनमन के आपलो अंडकीमन ने बांध,
आउर आपलो मने संगाउन रा†।
4 बुद के बल, “तुय मोचो बईन आस,”
आउर समज के आपलो मीत बनाव,
5 तेबे तुय फोबाउन-फोबाउन गोटेयातो दुसर चो बायले ले
आउर बेबिचारी बायले ले बाचुन रसे†।
6 गोटोक दिने, मय आपलो घर चो
खिड़की बाटले नियारले,
7 तेबे मय सादा लोगमन चो मंजी
गोटोक मूरक बीता जुवान के दखले,
8 हुन, बेसवा बायले चो घर चो सड़क बाटले जाते रये,
आउर बेसवा बायले चो घर चो खोर बाट के धरलो।
9 हुदलदांय बेर बसते रये बललोने, सांज होते रये,
पाछे, पिरिचनाय अंधार होली।
10 दखा, हुनके गोटोक बायले भेटली,
जोन बेसवा असन दखा देते रये, हुन खुबे चलाक रये।
11 हुन चिड़लीन आउर एड़जी बायले रये,
हुन किदलीदांय घरे नी रते रये;
12 हुन, कोनी समया ने खोरे, कोनी समया ने जोड़ान ने,
आउर सहर चो कोनामन ने, लोगमन चो घत ने रये।
13 तेबे हुन, हुन जुवान के धरुन चूमली,
आउर लाज नोहलोर हुनके बलली;
14 “मय मिला-मिसा जतरा*† चेगातो बोदना बोउन रये,
आउर मय मोचो बोदना के आजी चेगालेसे;
15 एईकाजे मय तुके भेट होतो काजे निकरले,
मय तुके डगराते रले, आउर एबे तुके भेटले।
16 मय आपलो खटेया ने,
मिसर चो सुंदर मकमल फटई ओचालेसे;
17 मोचो ओचना ने
गंधरस, धूप आउर दालचीनी छीचलेसे।
18 एईकाजे आव, आमी बियान पावतले मया करते रउं,
आमी गोटोक-दुसर के हरिक ले मया करते रउं।
19 कसनबलले मोचो मनुक घरे नीआय,
हुन परदेस गेलोसे।
20 हुन थयली भर पयसा धरुन गेलोसे,
पुनी अमरतले हुन घरे बोहड़ुन नी एये।”
21 असन-असन खुबे मोहातो गोटमन बलुन हुन हुनके फसाली,
आउर आपलो फोबानी गोटमन ले हुनके आपलो हक ने करली।
22 एईकाजे जसन बयला कसई थाने जायसे,
नोहले जसन कोनी भकवा के सिकरा ने बांधुन डंड देतो काजे नेयसोत,
उसने हुन एरा जुवान, हुनचो पाट-पाट गेलो,
23 हुन जुवान, हुन चड़ई असन आय, जोन फांदा बाटे रोस ने उड़ुन जायसे,
आउर हुन नी जाने, हुन बाटे हुनचो जीव जायदे
उसने ची हुन जुवान चो कारजा के बले धनु-कांड ने बिंददे।
24 एदांय ए मोचो बेटामन, मोचो सुना†,
मोचो गोटमन के धियान दियास।
25 तुचो मन, असन बायले बाटे नी जाओ,
तुय हुनचो खोरे भूलकुन बले नी जा।
26 कसनबलले खुबे लोग हुनचो किरता सत्यानास होलासोत;
आउर खुबे लोग मोरलासोत।
27 हुनचो घर, पतालपुर जातो बाटे आय,
हुन बाट मोरना ने अमराउआय।