दुसर चेतानीमन
6
ए मोचो बेटा, तुय आपलो घर-लग चो लोग चो करजा काजे जुमे होलीसीस जाले,आउर परदेसिया चो करजा काजे बाद मोरलीसीस जाले,
2 तुय आपलेई टोंड चो गोटमन ने फसलीसीस,
आउर आपलेई टोंड चो गोटमन ने धरा पड़लीसीस।
3 ए मोचो बेटा, तुय आपलो घर-लग चो लोग चो हाथे पड़लीसीस,
एईकाजे तुय असन कर, आउर आपने के बचाव:
झटके जा आउर हुनचो पांय पड़ुन गुहार।
4 तुय नी सो,
आउर टिपरी बले नी पाड़;
5 चीतर असन आपने के पारदेया चो हाथ ले,
आउर चड़ई असन चड़ई-मारुमन चो हाथ ले बचाव।
6 ए ठगरा, चाटीमन लगे जा;
हुनमन चो बुता के दख आउर बुद बीता बन।
7 हुनमन चो कोनी मुखिया,
कोनी राजपाल आउर कोनी राजा नीआत,
8 तेबले बले हुनमन जेट बेरा आपलो खादी-पीदी रूंडायसोत†,
आउर कटई बेरा खादी-पीदी जुहायसोत।
9 ए ठगरा, तुय किदलदांय ले सोवते रसे?
आउर किदलदांय तुके झूमा छांडुआय?
10 डंडिक आउर सोवते रा,
आउर गोटोक झपल मार आउर ढिंडा-मिंडा होउन सोवते रा†,
11 तेबे तुचो उपरे गरीबी, खंगार असन
आउर नानागती, हतियार धरलो बीर असन एउन पड़ेदे†।
12 अडरा मनुक आउर दुसट मनुक के दख,
हुन अडरा गोट गोटेयाउन-गोटेयाउन बुलते रयसे,
13 हुन आंईक मारेसे आउर पांय ले अक्यायसे,
आउर आपलो अंडकीमन ले अक्यायसे,
14 हुनचो मने उबढंगरी बिचारमन उबजेसे,
हुन अमदेया अडरा उआटमन करते रयसे
आउर लड़ई-झगड़ा उमडायसे;
15 एईकाजे हुनचो उपरे उधापड़े बिपती पड़ेदे,
आउर डंडिक ने ची हुन नास होयदे।
हुनचो बाचतो काई आसा नी रयदे†।
16 छय तीजमन के जहोवा बईर करुआय,
सात तीजमन के जहोवा घिनियाउआय;
17 बललोने, गुमान ले दखतो आंईकमन, फंद गोटेयातो जीब,
दोख नोहलो लोग चो लोउ बोहातो हाथमन,
18 दुसट उआट करतो मन,
अडरा बुता काजे रोस ने परातो पांय,
19 फंद गवई देतो बीता,
आउर भाई-भाईमन चो मंजी लड़ई-झगड़ा उमडातो लोग।
बेबिचार चो बिरुद चेतानी
20 ए मोचो बेटा, आपलो बुआ चो हुकुम के मान,
आउर आपलो आया चो सिखिया के नी छांड†।
21 एके अमदेया आपलो मने धरुन रा,
आउर आपलो टोडरा चो माला बनाव।
22 तुचो हिंडतो बेरा हुन तुके बाट दखायदे;
तुचो सोवतो बेरा तुचो राखा-जागा करेदे;
आउर तुय चेता रलो बेरा, तुचो संगे गोटेयाते रयदे।
23 कसनबलले हुकुम तो दीया आय, आउर सिखिया तो उजर आय,
सिखातो काजे दिलो डंड आउर दागा, जीवन चो बाट आय,
24 जेचोले तुय बेसवा बायले ले,
आउर फुसियाउन गोटेयातो बिती बेबिचारी बायले ले बले बाचसे।
25 हुनचो सुंदर रंग-रुप के दखुन आपलो मन ने लालच नी कर,
हुन तुके आपलो आंईक ले मोहाउक नी सको;
26 बेसवा किरता मनुक नानागती होउआय,
आउर बेबिचारी बायले, मनुक चो खुबे मोल चो जीव धरतो घत ने रउआय।
27 काय, कोनी आपलो कोरा ने इंगरा संगालोने
हुनचो फटई नी डसे?
28 काय, कोनी जरतो इंगरा उपरे हिंडलोने
हुनचो पांय नी डसे?
29 दुसर चो बायले लगे जातो लोग चो बले उसने हाल होयदे,
कोनी बले हुनके छिंयेदे, हुन डंड पायदे ची।
30 जोन चोर भूक किरता चोरेसे,
लोग हुनके अडरा नी समजोत।
31 फेर बले हुन धरा पड़ले सात गुना भोरुक पड़ेदे,
हुन, आपलो घर चो सपाय तीज के देउक पड़ेदे।
32 जोन बेबिचार करेसे, हुन मूरक आय,
हुन आपने के सत्यानास करेसे।
33 हुन खुबे मार खायदे आउर लाज पड़ेदे,
आउर अमदेया काजे हुनचो इजित जायदे।
34 कसनबलले हुन बायले चो मनुक ईरका-कुचर ले जंजाल रीस होयदे,
आउर पलटा धरतो बेरा, तुके नी ची छांडे।
35 तुय हुनके घुस दिले बले नी धरे,
हुनके कितलेई धन-माल दिले बले हुन नी माने।