बेबिचार चो बिरुद चेतानी
5
ए मोचो बेटा, मोचो सांगलो बुद चो गोटमन के धियान देस,मोचो सांगलो समज चो गोटमन के कान डेरुन सुन,
2 तेबे नंगत उआट बनातो समज तुके होयदे,
आउर तुचो टोंड ने बुद चो गोटमन ची रयदे।
3 बेसवा बायले चो टोंड ले ओंडार तेल असन गोटमन थिपते रयसे
आउर हुनचो गोटमन तेल ले बले आगर फिसलान रयसे।
4 मानतर पाछे, हुन कोचेला असन पीता,
आउर दुनो पाट लागन बिती खांडा असन आय।
5 हुनचो पांय मोरना बाटे खाले जायसे,
हुनचो डांहका पतालपुर बाटे नेयसे।
6 हुन, जीव चो सरसरा बाट ने जाउक नी सके;
हुन झक-झक होते बुलते रउआय, मानतर खुदे नी जाने।
7 एईकाजे ए मोचो बेटामन, मोचो सुना†,
आउर मोचो गोट के हेला नी समजा।
8 बेसवा बायले ले लापी राहा,
हुनचो डेवना लगे बले नी जाहा;
9 नोहले, तुमी आपलो इजित-मान के दुसर चो हाथे,
आउर आपलो जीव के दया नी करतो लोग के सोपासे,
10 आउर परदेसियामन तुमचो धन-माल के नेदे,
आउर तुमचो मसागत चो धन, दुसरमन चो घरे जायदे;
11 आउर तुमी आपलो सरासरी समया ने
तुमचो देहें थका-थकी होतो बेरा असन बलासे,
12 “मय काय काजे सिखातो काजे दिलो डंड के बईर करले,
आउर दागा देतो लोग चो गोटमन के हेला पतेयाले!
13 मय मोचो गुरुमन चो सिखियामन के नी मानले,
आउर मोके सिखातो लोगमन बाटे धियान नी दिले।
14 एईकाजे मय सपाय बरन चो डंड पावले
आउर सपाय लोगमन चो पुरे लाज पड़ले।”
15 तुय आपलेई पानी-पजरा ले आउर
आपलेई चुंआ चो पानी खा।
16 काय, तुचो पजरा चो पानी सड़क ने
आउर तुचो झोड़ी-पानी, जोड़ान बाटे बोहो?
17 हुनमन तुचेई काजे रओ,
तुके छांडुन आउर कोनी परदेसियामन काजे नी होओ।
18 तुचो पजरा* धन-धन रओ,
आपलो जुवान समो चो बायले संगे हरिक ने रा।
19 सुंदर चीतर आउर कोड़री असन
हुनचो छाती तुके अमदेया हरिक करो;
हुनचो मया, तुके अमदेया हुनचो बाटे मोहकाते रओ।
20 ए मोचो बेटा, तुय बेसवा बायले के काय काजे मोहसीस,
आउर बेबिचारी बायले के काय काजे पोटारसीस?
21 कसनबलले मनुक चो बाट जहोवा चो नंजर ले नी लुकलीसे,
जहोवा हुनचो सपाय बाट के धियान ले दखते रयसे।
22 दुसट आपलेई ओधरम बुतामन ने फसेदे,
आउर आपलेई पाप चो बांधन ने बांदी होयदे।
23 हुन डंड पाउन बले सिखिया के नी मानलो किरता मोरुन जायदे,
आउर भकवा बुता किरता आपलो बाट भुलकेदे।