बुद ले नफा
4
ए मोचो बेटामन, आपलो बुआ चो सिखिया के कान डेरुन सुना†,हुनके माना आउर समज-बुज पाहा;
2 कसनबलले मय तुमके खुबे नंगत सिखिया दिलेसे;
मोचो सिखिया के नी छांडा।
3 दखा, मय बले मोचो बुआ चो बेटा रले,
आउर आया चो एकलाय लाडरा बेटा रले।
4 मोचो बुआ मोके असन बलुन सिखाते रये,
“मोचो गोटमन उपरे तुय मन लगाउन रा;
मोचो हुकुममन के मान, तेबे तुय जीव रसे†।
5 बुद के पाव; आउर समज के धरुन रा;
मोचो गोटमन के नी भूलक आउर नी छांड।
6 बुद के नी छांड, हुन तुके दखा-राखा करेदे;
हुनके मया कर, हुन तुचो रखेया करेदे।
7 बुद सबुले नंगत आय, एईकाजे बुद पावतो काजे मसागत कर,
खुबे मोल देउन बले समज के पाव।
8 तुय हुनचो बड़ाई कर, हुन तुचो बाड़ती करेदे;
तुय हुनके मया कर, हुन तुचो मान बड़ायदे।
9 हुन, तुके सुंदर माला,
आउर तुचो मुंडे मयमा चो मुकुट पींदायदे।”
नंगत बाट ने हिंडतो सला
10 ए मोचो बेटा, सुन! मोचो गोटमन के मान,
तेबे तुय खुबे बरक जीव रसे।
11 मय तुके बुद चो बाट दखालेसे,
आउर सत-बाट ने हिंडालेसे।
12 तुय हिंडतो बेरा नी हकनसे,
तुय पराले बले ठटाय नी होसे।
13 सिखिया के धरुन रा, हुनके नी छांड;
हुनचो दखा-राखा कर, कसनबलले हुन तुचो जीव आय।
14 दुसटमन चो बाट ने पांय नी मंडाव,
आउर अडरा लोग चो बाट ने नी हिंड।
15 हुन बाट के छांडुन देस, हुन बाटे नी जा;
हुनके छांडुन नंगत बाट ले पुरे जा।
16 दुसटमन अडरा करलो नोहलो नी सोओत,
आउर कोकेई धोका दिलो नोहलो हुनमन के झूमा नी एये।
17 हुनमन अडरा बुता ले कमालो रोटी खाउआत,
आउर उबढंगरी बुता ले मिरालो अंगुर-मंद खाउआत।
18 धरमकारीमन चो बाट, बियान चो उजर असन आय,
आउर हुन उजर बाड़ते-बाड़ते मुंडे बेरा चो असन बरेदे।
19 मानतर दुसटमन चो बाट, पिरिचनाय अंधार असन आय;
हुनमन नी जानोत, कोन बाटे हकनदे।
20 ए मोचो बेटा, मोचो बचन के धियान देउन सुन,
मोचो गोट के कान डेरुन सुन।
21 हुनमन तुचो आंईक आड़े नी होओ
आउर हुनमन के आपलो मने संगाव।
22 हुनमन के डगराउन पावलो लोगमन काजे हुन जीव आय,
आउर हुनमन के पावलो लोगमन चो देहें-पांय चेंगचेंगा रउआय।
23 जुगे करुन तुचो मन के आपलो हक ने संगाव,
कसनबलले जीव चो मूर हुनी आय।
24 तुय आपलो टोंड ले अडरा गोट नी गोटेयाव,
आउर कपट गोट के नी गोटेयाव।
25 तुचो आंईक, पुरे ची दखते रओ,
तुचो नंजर पुरे ची रओ।
26 तुचो हिंडतो बाट के सरसरा बनाव,
तेबे तुचो सपाय बाट चमकट रयदे।
27 तुय उजा नोहले डेबरी बाट के नी धर,
आपलो पांय के अडरा बाटे हिंडतो ले बचाव।