जुवानमन काजे सला
3
ए मोचो बेटा, मोचो सिखिया के नी भूलक,आउर आपलो मन ने मोचो हुकुममन के संगाउन रा;
2 असन करले तुय खुबे बरक जीव रसे
आउर खुबे अस्तिर ने रसे।
3 सत-मया कर आउर पतेयातो लाईक मनुक हो;
एमन के तुय, माला असन आपलो टोडरा ने पींदुन रा,
आउर आपलो मने संगाउन रा†।
4 तेबे महापरभु आउर मनुक दुनो तुचोले हरिक रदे
आउर तुय खुबे बुद बीता होसे।
5 तुय आपलो समज उपरे भोरसा नी कर,
मानतर समपुरन मन ले जहोवा उपरे भोरसा संगाव।
6 हुनकेई सूरता करुन सपाय बुता कर,
तेबे हुनी तुचो काजे सरसरा बाट निकरायदे।
7 आपने के बुद बीता नी समज;
जहोवा के डर आउर अडरा बुता ले बाचुन रा।
8 असन करले तुचो देहें-पांय चेंग-चेंगा रयदे
आउर तुचो हाड़ा-गोड़ामन बले बरसक रयदे।
9 आपलो धन-माल आउर आपलो भुंय-बाड़ी चो सपाय नवा उबज देउन-देउन
जहोवा चो मयमा-मान कर;
10 असन करले तुचो गदेया-बाकरा भोरुन रयदे,
आउर तुचो रस-कुंड ने नवा अंगुर रस उछरते रयदे।
11 ए मोचो बेटा, जहोवा तुके सिखातो काजे डंड दिले, अडरा नी मान
आउर हुन तुके दागा दिले, मुरमुरा नी हो†,
12 जसन बुआ आपलो मया करतो बेटा के दागा देउआय,
उसने जहोवा जेके मया करुआय, हुनके दागा देउआय†।
सत धन
13 धन-धन आय हुन मनुक जोन बुद पायसे,
आउर हुन मनुक जेके समज मिरेसे,
14 कसनबलले बुद पावतोर रूपा ले आगर नंगत आय,
आउर हुनचो नफा, निरवा सोन ले आगर माहांग आय।
15 बुद-गियान, मनी-मुकतामन ले आगर माहांग आय,
आउर मन भावतो सपाय तीजमन ले काई बले हुनचो कटार नीआय†।
16 हुनचो उजा हाथे जुग-जुग चो जीव देतो सकत आसे;
आउर हुनचो डेबरी हाथे धन आउर मयमा बले देतो सकत आसे।
17 हुनचो सपाय बाट ने हरिक आसे,
आउर हुनचो बाट ने अस्तिर आसे।
18 बुद पावतो लोग काजे बुद, गोटोक जीव चो रूक असन आय†;
जोन बुद के बरसक धरुन रयसे, हुन धन-धन आय।
महापरभु गियान ले संवसार के बनालो
19 बुद ले ची जहोवा मंजपुर चो पाया मंडालो;
आउर समज ले सरग के चमकट करलो;
20 हुनचो गियान ले गड़िया समदूर ने पजरामन फुटली,
आउर बादरी ले ओस घसरेसे।
21 ए मोचो बेटा, ए गोटमन तुचो आंईक आड़े नी होओ;
नंगत बुद आउर नंगत उआट बनातो समज चो रखेया कर,
22 कसनबलले एमन ले तुके जीव मिरेदे,
आउर एमन तुचो टोडरा काजे माला बनदे।
23 तेबे तुय तुचो बाट ने काई डर नोहलोर हिंडसे
आउर तुय केबई नी हकनसे।
24 सोवतो बेरा तुके डर नी चेपाये;
आउर तुके अस्तिर ले झूमा एयदे।
25 उधापड़े बिपती ने पड़लोने,
आउर दुसटमन उपरे बिपती पड़लोने नी डर;
26 कसनबलले जहोवा तुचो साका होयदे
आउर तुचो पांय के फांदा ने फसुक नी देये।
27 भलई करतो सकत तुके आसे जाले, जोन भलई चो लाईक आसे,
हुनचो भलई करतो ले पाटे नी गुच।
28 तुचो घर-लग चो लोग तुके मांगलो तीज तुचो लगे आसे जाले,
हुनके नी बल, “जा, काली के फेर आव, मय काली के तुके देयंदे।”
29 तुचो घर-लग चो लोग, तुचो संगे अस्तिर ने रयसे जाले,
हुनचो बिरुद अडरा उआट नी कर।
30 जोन मनुक तुचो ले अडरा बेबार नी करलोसे,
हुनचो बिरुद फोकाहा ने झगड़ा नी कर।
31 उबागरी लोग ले ईरका नी हो,
आउर हुनचो असन चलनी-बुलनी नी कर;
32 कसनबलले जहोवा, कपटीमन के घिनियाउआय,
मानतर सोज लोगमन के आपलो भेद चो गोट के दखाउआय।
33 दुसटमन चो घरे, जहोवा चो सराप लागुआय,
मानतर धरमकारीमन रतो ठानमन ने हुनचो बर रउआय।
34 हुन, हांसी-खेली करुमन चो इजित धरुआय,
मानतर आपने के नानी करुमन उपरे दया करुआय†।
35 बुद बीता मान पायदे,
मानतर मूरकमन लाज पड़ेदे।