बुद चो मोल
2
ए मोचो बेटा, तुय मोचो गोटमन के मानुन,मोचो हुकुममन के आपलो मने संगालीस† जाले,
2 तुय बुद चो गोट के धियान ले सुनुन
समज चो गोट के मन लगाउन बिचारलीस जाले;
3 तुय नंगत बुद आउर समज पावतो काजे
खुबे मसागत ले हागदेउआस जाले,
4 रूपा के डगरातो असन हुनके डगराउआस जाले,
आउर लुकलो धन असन हुनके खोजुआस जाले—
5 तुय जहोवा चो डर के समजसे
आउर तुय महापरभु चो बारे ने गियान पावसे।
6 कसनबलले जहोवा ची बुद देउआय;
आउर हुनचेई टोंड ले गियान आउर समज चो गोट निकरुआय;
7 सोज लोग काजे हुनचो लगे नंगत गियान चो भंडार आसे;
आउर चोखा चलनी-बुलनी चो लोग काजे हुन, ढाल आय,
8 हुन सत-नियाव चो बाट चो रखेया करुआय
आउर आपलो भगतमन चो बाट चो बले रखेया करुआय।
9 तेबे तुय धरम आउर सत-नियाव के जानसे आउर कोचई पाटेया नी होसे
आउर सपाय बरन चो नंगत चलनी-बुलनी के समजुक सकसे;
10 कसनबलले गियान तुचो मने बसेदे,
आउर नंगत बुद ले तुचो जीव अस्तिर रयदे;
11 नंगत उआट बनातो बुद तुचो रखेया करेदे;
आउर समज तुके समालेदे।
12 हुन तुके अडरा बाट ले
आउर टेचराहामन ले बचायदे,
13 जोनमन सत बाट के छांडुन
अंधार बाट ने हिंडसोत,
14 अडरा बुता करतो ले हरिक होयसोत
आउर अडरा गोटमन ले हरिक-उदीम ने रयसोत;
15 हुनमन चो बाट कोकटी-बाकटी आसे,
आउर हुनमन चो चलनी-बुलनी ने कपट रयसे।
16 तेबे तुय फोबाउन-फोबाउन गोटेयातो दुसर चो बायले ले,
आउर बेबिचारी बायले ले बाचुन रसे†,
17 जोन आपलो जुवान बेरा चो मनुक के छांडुन देउआय
आउर महापरभु पुरे हुनचो संगे करलो बायदा के भुलकुआय;
18 हुनचो घर मोरना बाटे उतराउआय,
आउर हुनचो बाट, मोरलो लोग चो आत्मा लगे अमराउआय;
19 हुन बाट के धरलो लोग कोनी बले बोहड़ुन नी एओत,
आउर हुनमन, फेर ले जीव चो बाट पाउक नी सकोत।
20 एईकाजे तुय नंगत लोगमन चो बाट ने हिंड,
आउर धरमकारीमन चो बाट के चमकट धरुन रा।
21 कसनबलले धरमकारीमन ची मंजपुर ने रदे,
आउर सोज लोग ची हुता चमकट रदे;
22 दुसट लोग मंजपुर ले नास होदे,
आउर धोका देउ के चेर संगे उखनुन पकादे।