नीतिबचन
1
इसराएल चो राजा दाउद चो बेटा, सुलेमान चो नीतिबचन:नीतिबचन ले नफा
2 नीतिबचन के पढ़तो लोग, बुद-गियान आउर सिखिया पाओ,
आउर बुद चो भेद के समजो,
3 हुन बुता-भयना करतोने चोखा, आउर सत-धरम, सत-नियाव,
आउर कोचई पाटेया नी होतो सिखिया पाओ;
4 सादा लोग, चलाक बनो,
आउर जुवान, बुद-गियान आउर नंगत उआट बनातो समज पाओ।
5 नीतिवचन के सुनुन बुद बीता, आपलो गियान बड़ाओ
आउर समज बीता, नंगत-अडरा जानतो सिखिया पाओ,
6 जेचोले हुन, नीतिबचन आउर कहनी-कटावमन के,
भेद चो गोट आउर धंधा के नंगत ले समजेदे।
7 जहोवा के डरुन चलतोर बुद चो मूर आय;
मानतर मूरक, बुद आउर सिखिया के हेला समजुआय।
जुवानमन काजे सला
8 ए मोचो बेटा, आपलो बुआ चो सिखिया के कान डेरुन सुन†,
आउर आपलो आया चो सिखिया के नी छांड†;
9 कसनबलले हुनमन तुचो मुंड काजे सुंदर मुकुट असन,
आउर तुचो टोडरा काजे माला असन होयदे।
10 ए मोचो बेटा, पापीमन तुके फुसियालोने,
तुय हुनमन चो गोट के नी धर।
11 हुनमन तुके बलदे, “आमचो संगे जो,
आमी दोख नोहलो लोगमन के मोरते मारतो घत ने रवां;
12 आमी हुनमन के पतालपुर असन जीवता-जीवता
आउर मोठ-खोदरा असन हुनीमन के गुला-गुला गिरवां।
13 आमके सपाय बरन चो महांग तीजमन मिरेदे;
झीका-उड़मा करलो तीजमन ले आमचो घरमन के भोरवां।
14 तुय आमचो संगे मांदी हो;
आमी सपाय जोंहरेया बाटा करवां।”
15 ए मोचो बेटा, तुय ओधरमीमन चो बाट नी धर,
आउर हुनमन चो खोरे डांहका बले नी पकाव;
16 कसनबलले हुनमन, अडरा बुता करतो काजे परायसोत
आउर मोरते मारतो काजे हलवाल होयसोत†।
17 चड़ई चो दखते-दखते
फांदा मंडातोर फोकाहा आय;
18 हुनमन आपनेके मारतो घत ने रयसोत!
आउर आपलेई जीव के नास करसोत!
19 सपाय ललचाहामन चो सरासरी उसनेचे होउआय;
आपलेई लालच किरता हुनमन मोरसोत।
बुद काय सांगेसे?
20 बुद, सड़क ने बड़े जोर ले हागदेयसे;
आउर जोड़ानमन ने बले हुनमन के सांगेसे।
21 हुन, हाट-हड़री ने आउर सहर चो देवड़ीमन ने बले
चिचियाउन सांगेसे:
22 “ए सादा लोगमन, केबतले तुमी सादा रउक मन करासे?
ए हांसी-खेली करतो लोगमन, केबतले तुमी हांसी-खेली करुक मन करासे?
ए मूरकमन, केबतले तुमी बुद के बईर करासे?
23 तुमी मोचो दागा सुना आउर मन बोहड़ाहा;
सुना, मय मोचो बिचार तुमचो उपरे रिकायंदे;
आउर आपलो मन चो गोट तुमके सांगेंदे।
24 मय तुमके हागदिले, मानतर तुमी नी सुनलास,
मय, तुमचो बाटे आपलो हाथ लमाले, मानतर कोनी धियान नी दिलास,
25 तुमी मोचो सपाय सलामन के नी मानलास
आउर मोचो दागा के हेला समजलास,
26 एईकाजे तुमचो बिपती बेरा मय बले हांसेंदे;
आउर तुमके डर चेपातो बेरा हांसी-खेली करेंदे,
27 जिदलदांय लेहरा-धुका ईलो असन तुमके डर चेपायदे,
आउर भूत बिती लेहरा ईलो असन तुमके गराहां चेपायदे,
आउर तुमी गराहां आउर बिपती ने फसुन राहासे।
28 हुदलदांय हुनमन मोके हागदेदे, मानतर मय नी सुनेंदे;
हुनमन खुबे मसागत ले मोके डगरादे, मानतर मोके नी भेटदे।
29 कसनबलले हुनमन बुद के बईर करला
आउर जहोवा के डरुन चलुक मन नी करला,
30 हुनमन मोचो सला के नी मानला,
आउर मोचो दिलो सपाय दागा के बले हेला समजला,
31 एईकाजे आपलो करनी चो पलटा हुनमन पावदे
आउर आपलोई उआटमन ले सत्यानास होदे।
32 बाट भुलकलो किरता सादा लोग नास होदे,
आउर फिकिर नोहलो रलो किरता मूरकमन मोरदे;
33 मानतर जोनमन मोचो सुनदे,
हुनमन काई डर नोहलोर अस्तिर ने रदे।”