इसराएल, महापरभु चो जय-जय करो
149
जहोवा चो जय-जय करा!जहोवा काजे नवा गीत गाहा,
भगतमन चो मंडली ने हुनचो जय-जय गीत गाहा!
2 इसराएल आपने के बनाउ महापरभु ले हरिक होओ;
सियोन चो लोग आपलो राजा किरता हरिक-उदीम होओत।
3 हुनमन नाचते-नाचते, हुनचो नाव चो जय-जय करोत,
डफली आउर सारंगी बजाते हुनचो भजन गाओत!
4 कसनबलले जहोवा आपलो रयत ले हरिक आसे;
हुन, सोज लोगमन के मुक्ति देउन हुनमन चो मान बड़ायसे।
5 भगतमन हुनचो मयमा ले हरिक होओत;
आउर आपलो ओचना ने रउन बले जय-जय करोत।
6 हुनमन आपलो राग ले महापरभु के सहराओत
आउर हुनमन चो हाथे दुय-धारी लागन खांडामन रओ,
7 कि हुनमन जात-जात चो लोगमन ले पलटा धरोत,
आउर राज-राज चो लोगमन के डंड देओत,
8 आउर हुनमन चो राजामन के सिकरामन ले,
आउर हुनमन चो मुखियामन के अड़गनामन ले बांधोत,
9 आउर हुनमन के नियम हिसाब ले डंड देओत।
महापरभु चो सपाय भगतमन चो असने चे इजित-मान होयदे।
जहोवा चो जय-जय करा!