सपाय जहोवाचेई जय-जय करा
जहोवा चो जय-जय करा
148
जहोवा चो जय-जय करा!सरग ने जहोवा चो जय-जय करा;
उपरपुर ने हुनचो जय-जय करा!
2 हुनचो सपाय दूतमन, हुनचो जय-जय करा;
सरग चो सपाय सेनामन, हुनचो जय-जय करा!
3 ए बेर आउर जोन, हुनचो जय-जय करा;
ए सपाय बरतो तारामन, हुनचो जय-जय करा!
4 ए सबुले उपर चो बादरी,
आउर बादरी उपर चो पानी, दुनो हुनचो जय-जय करा!
5 हुनमन सपाय जहोवा चो नाव चो जय-जय करोत,
कसनबलले हुनचो हुकुम ले हुनमन बनला।
6 हुन, अमदेया काजे हुनमन के चमकट करलोसे;
हुनचो हुकुम ले असन संद बनली, जेके हुनमन नाहकुक नी सकोत।
7 मंजपुर ले जहोवा चो जय-जय करा!
ए जल-जनतुरमन आउर गड़िया समदूर,
8 ए आईग आउर करा, कापस असन करा आउर धुआंरी,
ए हुनचो हुकुम मानतो लेहरा-धुका!
9 ए डोंगरीमन आउर ढिपकामन,
फर धरतो रूकमन आउर सपाय देवदार* रूकमन!
10 ए रान-जियादमन आउर सपाय पोसलो पसुमन,
ए रेंगतो जनतुरमन आउर चड़ईमन!
11 ए मंजपुर चो राजामन आउर रयतमन,
आउर मंजपुर चो सपाय राजपालमन आउर हकदारमन!
12 ए सपाय जुवानमन आउर कुंआरी लेकीमन,
सियानमन आउर पिलामन!
13 सपाय जहोवा चो नाव चो जय-जय करा,
कसनबलले हुनचेई नाव सबुले बड़े आय;
हुनचो मयमा, मंजपुर आउर सरग ले बले खुबे आगर आय।
14 हुन आपलो रयत काजे गोटोक सींग* के बाछलोसे*,
हुनचो सपाय पवितर लोगमन काजे
बललोने, इसराएलिमन काजे जोन हुनके मानुआत।
जहोवा चो जय-जय करा!