सबुले सकत महापरभु चो जय-जय
147
जहोवा चो जय-जय करा!कसनबलले आमचो महापरभु चो भजन गावतोर नंगत आय;
हुन नंगत आउर जय-जय करतो लाईक आय।
2 जहोवा, जरूसलेम के फेर ले बसापत करेसे;
कसनबलले इसराएल ले निकरालो सपाय लोग के हुनी जुहायसे।
3 दुख-तकलीस ले मुरुसनाय होलो लोग के हुन ढाढ़ुस देयसे,
आउर हुनमन चो घावमन ने उपाय बांधुन उजरायसे।
4 हुन, तारामन के गनेसे;
आउर गोटोक-गोटोक चो नाव संगायसे।
5 आमचो परभु माहान आउर खुबे बलेयार आय;
कसनबलले हुन गियान चो भंडार आय।
6 जहोवा नानागती होलो लोगमन के उठायसे;
मानतर दुसटमन के भुंये घसरायसे।
7 धन-धन करुन जहोवा चो गीत गाहा;
आउर सारंगी बजाउन आमचो महापरभु चो भजन गाहा।
8 हुन बादरी ढकायसे,
मंजपुर ने बरसा काजे पानी जगायसे,
आउर डोंगरीमन ने रोंडा अखरायसे।
9 हुन, जनावरमन के खुआयसे,
आउर गागतो कावरा पिलामन के बले खादी-पीदी देयसे।
10 हुन, घोड़ा चो सकत के मने नी करे,
आउर खुबे रोस ले परातो मनुक ले बले हरिक नी होये;
11 मानतर जहोवा के डरतो लोग ले हुन हरिक रयसे,
बललोने, जोनमन हुनचो सत-मया उपरे पक्का भोरसा करसोत।
12 ए जरूसलेम, जहोवा चो बड़ाई कर!
ए सियोन, आपलो महापरभु चो जय-जय कर!
13 कसनबलले हुनी तुचो देवड़ीमन के चमकट करेसे*;
आउर तुचो पिलामन के बर देयसे।
14 हुन तुके आपलो देस ने अस्तिर ने रउक देयसे;
आउर तुके नंगत ले नंगत गउं पुरत ले देयसे।
15 हुन, मंजपुर ने आपलो हुकुम पठायसे;
हुनचो बचन तूरते बिगरेसे।
16 हुन, कापस असन करा घसरायसे;
आउर लाकड़ी असन धुंआरी ढकायसे।
17 हुन, करा-गोंदीमन घसरायसे—
हुन पठालो सीत के कोन कटलाउक सकेदे?
18 हुन, हुकुम देउन करा के गलायसे;
आउर लेहरा ले पानी के बोहायसे।
19 हुन, जाकूब के आपलो बचन,
बललोने, इसराएल के आपलो नियममन आउर सिखियामन दिलोसे।
20 कोनी दुसर जात चो लोगमन संगे हुन असन बेबार नी करलो;
आउर दुसर कोनी हुनचो नियममन के नी जानला।
जहोवा चो जय-जय करा!