महापरभु चो साहरा काजे जय-जय
146
जहोवा चो जय-जय करा!ए मोचो जीव, जहोवा चो जय-जय कर!
2 मय जीवता जीव भर जहोवा चो जय-जय करेंदे;
मय जीव रओतले आमचो महापरभु चो भजन-गीत गावते रयंदे।
3 तुमी मुखियामन उपरे भोरसा नी करा,
लोगमन उपरे बले भोरसा नी करा, हुनमन तुमके बचाउक नी सकोत।
4 हुनमन चो बले जीव जायदे आउर माटी ने मिसदे;
हुनी दिने हुनमन चो बिचारलो सपाय उआट नास होयदे।
5 धन-धन आय हुन, जेके जाकूब चो महापरभु साहरा होयसे,
आउर जेचो भोरसा जहोवा महापरभु उपरे आसे,
6 जहोवा, बादरी आउर मंजपुर,
समदूर आउर हुता रतो सपाय के बनालोसे;
हुनचो बचन अमदेया सत रयसे;
7 हुन, नानागती होलो लोग चो सत-नियाव करेसे;
आउर भूके रलो लोग के खादी-पीदी देयसे।
जहोवा, कयदीमन के छंडायसे;
8 जहोवा, कानामन के दखतो सकत देयसे।
जहोवा, कुबड़ामन के सलसला उबायसे;
जहोवा, धरमकारीमन के मया करेसे।
9 जहोवा, परदेसियामन चो रखेया करेसे;
पोरटा-पोसरमन आउर रांडीमन के साहरा करेसे,
मानतर दुसटमन चो उआटमन के नास करुआय।
10 जहोवा अमदेया राज करेदे,
ए सियोन, तुचो महापरभु पीड़ी-पीड़ी ले राज करते रयदे।
जहोवा चो जय-जय करा!