महापरभु भलई करलो काजे जय-जय गीत
दाउद चो जय-जय गीत
145
ए मोचो महापरभु, ए राजा, मय तुके सहरायंदे,आउर तुचो नाव के अमदेया धन-धन बलते रयंदे।
2 रोजे दिना मय तुके धन-धन करेंदे,
आउर अमदेया तुचो नाव चो जय-जय करते रयंदे।
3 जहोवा माहान आउर खुबे जय-जय करतो लाईक आय;
हुनचो बड़ाई चो भेद आमके समजुक नी होये।
4 पीड़ी-पीड़ी चो लोग तुचो बुतामन चो बड़ाई करदे
आउर तुचो सकत बुतामन चो बारे ने गोटोक-गोटोक करुन सांगते रदे।
5 मय तुचो ठाट-बाट मयमा
आउर तुचो अचरित बुतामन चो धियान ने रयंदे।
6 लोगमन, तुचो डरतो लाईक सकत बुतामन चो गोट-बात करदे,
आउर मय तुचो बड़ाई चो बारे ने सुनायंदे।
7 लोगमन, तुचो करलो खुबे भलई काजे हरिक-उदीम होदे,
आउर तुचो धारनिक चो जय-जय गीत गावदे।
8 जहोवा दया-करु आउर जीव-दुखु आय,
हुन झपके रीस नी होये आउर अमदेया सत-मया करुआय।
9 जहोवा सपाय काजे नंगत आय,
आउर आपलो बनालो सपाय के जीव-दुखुआय।
10 ए जहोवा तुचो बनालो सपाय, तुके धन-धन करदे,
आउर तुचो सपाय भगतमन तुके धन-धन बलदे।
11 हुनमन तुचो राज चो मयमा चो गोट-बात करदे,
आउर तुचो सकत चो बारे ने सांगदे
12 कि लोगमन तुचो सकत बुता,
आउर तुचो राज चो ठाट-बाट चो मयमा चो बारे ने जानोत।
13 तुचो राज जुग-जुग काजे आय,
आउर पीड़ी-पीड़ी ले तुय राज करसे।
14 जहोवा सपाय घसरतोमन के समालुआय,
आउर सपाय कुबड़ामन के सलसला उबाउआय।
15 सपाय तुचो बाट दखते रयसोत,
तुय हुनमन के समया ने खादी-पीदी देयसीस।
16 तुय आपलो मुटी उगाड़ुन
सपाय जीवमन चो अधाड़ भरसीस।
17 जहोवा चो सपाय बाट धारनिक आय,
आउर हुन सपाय के जीव-दुखुआय।
18 जहोवा आपने के हाग देतो सपाय लोगमन संगे रउआय,
बललोने, जोन हुनके सत-मन ले गुहारुआत।
19 जहोवा हुनके डरुन चलतो लोगमन चो मन-इछा के पुरा करुआय;
हुनमन चो गुहार सुनुन हुनमन के बचाउआय।
20 जहोवा हुनके मया करतो सपाय लोगमन चो रखेया करुआय,
मानतर सपाय दुसटमन के नास करुआय।
21 मय जहोवा चो जय-जय करेंदे,
आउर सपाय जीवमन, अमदेया हुनचो पवितर नाव चो जय-जय बलते रदे।