जीतलो काजे धन-धन पारथना
दाउद चो भजन-गीत
144
जहोवा चो धन-धन होओ,हुन मोचो रखेया करु सिलपट आय,
हुन मोचो हाथमन के लड़ुक
आउर अंडकीमन के जुद करुक सिखायसे;
2 हुन मोचो सत-मया आउर मोचो भाड़ा आय,
मोचो डेंग ठान आउर मोचो छंडाउ परभु आय,
हुन मोचो ढाल आउर मोके सरन देउ परभु आय,
हुन सपाय लोगमन के आपलो हक ने करुआय।
3 ए जहोवा, मनुक काय आय कि तुय हुनके सूरता करसीस,
मोरतो मनुक काय आय कि तुय हुनके धियान देयसीस?
4 मनुक तो फुंडा कटार आय,
हुनचो जीवना हाजतो छांय असन आय।
5 ए जहोवा, सरगपुर के लोआउन खाले उतरुन आव!
डोंगरीमन के छींव कि हुताले कुमला उठो!
6 बादरी चड़लाउन हुनमन के बिगराव;
आउर आपलो कांड बिंदुन हुनमन के डराव।
7 उपर ले आपलो हाथ लमाउन
मोके महासमदूर ले झीकुन निकराव
बललोने, परगांयामन चो हक ले मोके छंडाव,
8 जोनमन चो टोंड ले फंद गोटमन ची निकरेसे,
आउर हुनमन चो उजा हाथ धोका देउआय।
9 ए महापरभु, मय तुचो जय-जय चो नवा गीत गायंदे;
दस तार बीती बाजा बजाउन-बजाउन मय तुचो भजन गायंदे।
10 तुय राजामन के जीताउआस,
आउर आपलो कमेया दाउद के मोरना चो खांडा ले बचाउआस।
11 मोके परगांयामन चो हाथ ले छंडाव,
जोनमन चो टोंड ले फंद गोटमन ची निकरेसे,
आउर हुनमन चो उजा हाथ धोका देउआय।
12 आमचो बेटामन जुवान बेरा
सलसला बाड़लो बुटामन असन होओत,
आउर आमचो बेटीमन, माहाल काजे कारीगिरी करुन बनालो खमामन असन होओत।
13 आमचो गदेयामन भोरुन रओ,
हुन थाने सपाय बरन चो धान-पान रओ;
आमचो छेरी-मेंडीमन भाटामन ने
हजारो पिला* पकाओत;
14 आमचो गायमन के बरसक पिलामन होओत,
गायमन, पिलामन के नी चुआओत;
आमचो गांवमन ने गागा-बोगा नी होओ!
15 असन बर पावतो लोगमन धन-धन आत!
धन-धन आत हुनमन, जोनमन चो महापरभु, जहोवा आय।