छंडावा काजे पारथना
दाउद चो भजन-गीत
143
ए जहोवा, मोचो पारथना सुन;मोचो साहरा काजे गाग-गगरीही होतोके सुन!
आउर मोके उत्तर देस, कसनबलले तुय सत आउर धरमी आस।
2 आपलो कमेया के नियाव-दाव ने नी पाड़,
कसनबलले तुचो नंजर ने कोनी मनुक धारनिक नीआत।
3 मोचो बयरीमन मोचो जीव धरतो काजे खेदेसोत,
हुनमन मोचो जीवना के सत्यानास करलासे,
आउर मोके खुबे दिन ले मोरलो लोग असन पिरिचनाय अंधारे संगालासे।
4 एईकाजे मोचो आत्मा भीतर ले डाहाल-बिकाल होयसे;
आउर मोचो मन मुरुसनाय आसे।
5 मोके आगे-जुगे चो दिनमन सूरता एयसे,
मय तुचो अचरित बुतामन के सूरता करेंसे,
आउर तुचो करलो बुतामन चो धियान ने आंसे।
6 मय आपलो हाथ तुचो बाटे पसारेंसे;
डांगरा गेलो भुंय असन मोचो जीव तुचो काजे पियास होलीसे। निनास
7 ए जहोवा, मोके झटके उत्तर देस,
मोचो आत्मा मुछियालीसे,
मोचो ले आपलो थमना नी लुकाव,
नोहले मय मोठ ने पड़लो लोग असन होयंदे।
8 बड़े बियाने मोके आपलो सत-मया चो बचन सुनाव,
कसनबलले मय तुचेई उपरे भोरसा करेंसे।
जोन बाट ने मोके चलतोर आय, हुनी बाट के मोके सिखाव,
कसनबलले मय तुचेई बाटे मन लगालेसे।
9 ए जहोवा, मय तुचो सरन ने ईलेसे;
मोके बयरीमन ले बचाव।
10 मोके तुचो मन-इछा पुरा करुक सिखाव,
कसनबलले तुय मोचो महापरभु आस,
तुचो भला आत्मा
मोके सत बाट ने चलाओ।
11 ए जहोवा, आपलो नाव किरता मोके जियाव।
आपलो धारनिक ले मोचो जीव के बिपती ले बचाव।
12 मोचो उपरे सत-मया करुन मोचो बयरीमन के
आउर मोके डाटा-टेवा करतो सपाय लोग के सत्यानास कर,
कसनबलले मय तुचो कमेया आंय।