सांज बेरा चो पारथना
दाउद चो भजन-गीत
141
ए जहोवा, मय तुके हागदेयंसे, मोचो लगे झटके आव;जिदलदांय मय तुके हागदेयंदे, तुय धियान ले मोचो सुन।
2 तुचो पुरे मोचो पारथना नंगत बास देतो धूप,
आउर मोचो हाथ पसारतोर सांज बेरा चो चेगावा असन होओ।
3 ए जहोवा, मोचो टोंड के समाल,
आउर मोचो ओटमन के अडरा गोट ले बचाव।
4 मोचो मन ने काई अडरा बिचार एउक नी देस,
आउर ओधरमीमन संगे
दुसट बुता करुक नी देस;
हुनमन चो सुवाद खादी-पीदी ले काई खाउक नी देस।
5 धरमकारीमन मोके मारले, हुन दया कटार आय;
आउर हुनमन मोके दागा दिले,
मोचो मुंडे तेल रिकालो कटार आय, मय हुनके नाई नी बलें;
मानतर अमदेया दुसटमन चो अडरा बुता चो पलटा ने मय पारथना चो भर ने रयंदे।
6 जिदलदांय हुनमन चो मुखियामन के डंड देयदे*,
तेबे हुनमन जानदे कि मोचो बचन सत आय।
7 जसन भुंये नांगर जोपलोने ढेला फुटुआय,
उसनेची हुनमन चो हाड़ामन पतालपुर चो मुं ने बिखरुआय।*
8 मानतर ए परभु जहोवा, मय तुचेई बाटे दखेंसे;
मय तुचो सरन ने ईलेसे; तुय मोचो जीव के बचाव।
9 मोके धरतो काजे मंडालो फांदा ले,
आउर दुसटमन चो जाल ले मोके बचाव।
10 दुसटमन आपलो जालमन ने आपने फसोत,
मानतर मोके बाचुक होओ।