रखेया काजे पारथना
बजनेया मुखिया काजे दाउद चो भजन-गीत
140
ए जहोवा, दुसटमन चो हाथ ले मोके बचाव;उबढंगरी मनुकमन ले मोचो रखेया कर,
2 कसनबलले हुनमन आपलो मने अडरा उआटमन करलासोत
हुनमन सरलगा झगड़ा-लड़ई काजे उकसाते रयसोत।
3 हुनमन चो गोटेयातोर साप चाबलो असन आय,
हुनमन चो टोंडे नाग साप असन बिस आसे। निनास
4 ए जहोवा, दुसटमन चो हाथ ले मोके बचाव,
उबढंगरी मनुकमन ले मोचो रखेया कर,
कसनबलले हुनमन मोके सत्यानास करतो उआट करलासोत।
5 गुमानीमन मोके धरतो काजे फांदा मंडालासे,
हुनमन मोचो जातो बाटे जाल मंडालासे,
आउर मोके धरतो काजे फांदा-खोदरा खोड़लासे। निनास
6 मय जहोवा के बलले; “तुय मोचो महापरभु आस;
ए जहोवा, तुय मोचो गाग-गगरीही होतोके सुनुन मोके साका हो।”
7 ए परभु जहोवा! तुय आपलो सकत ले मोके बचाउआस,
जुद दिने तुय मोचो रखेया करलीस।
8 ए जहोवा, दुसटमन चो मन-इछा पुरा होउक नी देस;
आउर हुनमन के अडरा उआट करुक नी देस, नोहले हुनमन गुमान करदे। निनास
9 जोनमन मोचो उपरे बिपती आनतो बिचार करसोत;
हुनमनचेई गोट ले हुनीमन के बिपती ने पाड़!
10 हुनमन उपरे इंगरा घसरो, हुनमन के आईग ने पकाओत!
आउर असन खोदरा ने घसराओत कि हुताले निकरुक नी सकोत!
11 बदी देउ लोग के मंजपुर ने चमकट होउक नी देस;
उबढंगरी लोग के झटके नास होउक देस!
12 ए जहोवा, मय जाने, तुय नानागती होलो लोग चो पाटेया होसे,
आउर गरीब-दुखी चो सत-नियाव करसे।
13 मय पक्का जानेंसे, धरमकारी लोग तुचो नाव चो धन-धन करदे,
आउर सोज लोग तुचो संगे रदे।