महापरभु चो सिद गियान
बजनेया मुखिया काजे दाउद चो भजन-गीत
139
ए जहोवा, तुय मोके परखुन जानलीसीस।2 तुय मोचो उठतो-बसतो के जानसीस;
तुय मोचो बिचारमन के लापी ले बले समजुआस।
3 तुय मोचो बाट-हिंडतो आउर सोवतो के नंगत ले परखलीस,
आउर मोचो चलनी-बुलनी के बले जानीस।
4 ए जहोवा, मोचो गोटेयातोले आगे
मोचो टोंड चो सपाय गोट के तुय जानीस।
5 तुय मोके भोंवरक ले आड़ आसीस,
आउर मोचो मुंडे आपलो हाथ थापलीसीस।
6 ए गियान मोचो काजे खुबे अचरित चो आय;
एचो भेद के मोके मुरे समजुक नी होये।
7 मय तुचो आत्मा ले बाचुन कहां लुकुआंय?
नोहले तुचो पुरे ले कहां पराउआंय?
8 मय सरग ने चेगलोने तुय हुता आसीस;
मय पतालपुरे आपलो ओचना ओछालोने, तुय हुता बले आसीस।
9 मय बियान के पाटकी असन लगाउन उड़ुन गेलोने
आउर समदूर चो हुन पाट जाउन बसापत करलोने,
10 हुता बले तुय आपलो हाथ ले मोके बाट दखासे,
आउर तुचो उजा हाथ ले मोके चमकट धरुन रसे।
11 मय असन बलेंदे, “मय अंधार ने लुकेंदे,
आउर मोचो भोंवरक चो उजर, राती असन अंधार होयदे,”
12 तेबले बले अंधार मोके तुचो ले नी लुकाये,
रात बले दिन असन उजर देयदे;
कसनबलले तुचो काजे अंधार आउर उजर गोटकी कटार आय।
13 मोचो देहें भीतर चो सपाय अंगमन के तुयचे बनालीस;
तुय मोके मोचो आया चो पेट ने घड़लीस।
14 मय तुचो धन-धन करेंदे, कसनबलले तुय मोके खुबे भक्यातो आउर अचरित बरन ले बनालिसीस।
तुचो बुता खुबे डरतो लाईक आय,
एके मय नंगत ले जानें।
15 मोचो देहें आया चो पेट ने रुप धरतो बेरा ले,
तुय मोचो हाड़ामन के अचरित ले बनालीस,
हुदलदांय ले काई बले तुचो ले नी लुकलीसे।
16 तुचो आंईकमन मोचो बनतो देहें के दखली,
आउर मोचो देहें चो सपाय अंगमन
बनतो ले आगे
तुचो किताप ने लिखलोर आसे।
17 ए महापरभु, मोचो काजे तुचो बिचार खुबे मोल चो आय!
हुनके मोलयाउक नी होये!
18 मय हुनके गनलोने बारु ले बले आगर होती;
चेतलोदांय ले मय तुचेई संगे रयंसे।
19 ए महापरभु, तुय दुसटमन के मोरते मारले नंगत होती,
तेबे माने मारामन, मोचो ले लापी रदे—
20 कसनबलले हुनमन तुचो बिरुद फंद गोट गोटेयायसोत,
तुचो बयरीमन फोकाहा तुचो नाव धरसोत!
21 ए जहोवा, काय मय तुचो बयरीमन ले बईर नी करें?
आउर काय तुचो बिरुद करुमन के रीस नी होयें?
22 मय हुनमन के खुबे घिनियाउआंय;
आउर हुनमन के आपलो बयरी समजुआंय।
23 ए महापरभु, मोके परखुन मोचो मन चो गोट के जान;
मोके जाचुन मोचो मन चो बिचारमन के जान।
24 दख, मोचो ने काई अडरा चलनी-बुलनी आसे कि नाई
आउर मोके जुग-जुग चो बाट दखाव।