महापरभु चो दया काजे धन-धन
दाउद चो भजन-गीत
138
समपुरन मन ले मय तुचो धन-धन करेंसे;देव-धामीमन चो पुरे बले मय तुचो भजन गायंसे;
2 मय तुचो पवितर मंदिर बाटे डंडासरन करेंसे;
तुचो सत-मया आउर सत किरता मय तुचो नाव चो धन-धन करेंसे;
कसनबलले तुय आपलो नाव आउर आपलो बचन के
सपाय ले आगर मयमा-मान दिलीसीस।
3 जोन दिने मय तुके हागदिले, हुनी दिने तुय मोचो सुनलीस,
आउर मोके सकत देउन मोचो ढाढ़ुस बड़ालीस।
4 ए जहोवा, मंजपुर चो सपाय राजामन तुचो जय-जय करदे,
कसनबलले हुनमन तुचो बचन सुनलासे।
5 हुनमन जहोवा करलो बुतामन चो बारे ने गावदे,
कसनबलले जहोवा चो मयमा खुबे आसे।
6 जहोवा माहान आय, फेर बले हुन सोज लोगमन के धियान देयसे;
मानतर गुमान करुमन के लापी ले चितायसे।
7 मय बिपती ने पड़ले बले तुय मोके जियासे,
मोके रीस होतो बयरीमन चो बिरुद तुय उबा होसे,
तुय आपलो हाथ के लमासे,
आउर तुचो उजा हाथ ले मोके बचासे।
8 जहोवा मोचो काजे बनालो सपाय उआट पुरा करेदे,
ए जहोवा, तुचो सत-मया जुग-जुग काजे आय।
आपलो हाथ चो बुतामन के नी छांड।