बिपती बेरा धीरजा
बजनेया मुखिया जदूतून काजे आसाप† लिखलो भजन-गीत
77
मय गाग-गगरीही होउन महापरभु के गुहारेंसे,मय हुनके गुहारेंसे कि हुन मोचो सुनो।
2 बिपती बेरा मय परभु के डगराते रले;
गुलाय राती मय हाथ पसारुन गुहारले आउर नी थाकले;
फेर बले मोके मुरे अस्तिर नी मिरली।
3 मय, महापरभु के धियान करुन डाहाल-बिकाल होयंसे;
आउर मोचो मन मुरुसनाय होयसे। निनास
4 तुय मोके टिपरी पाड़ुक बले नी देयसीस;
दुख-तकलीस किरता मोचो टोंड ले गोट नी फुटे।
5 मय आगे चो दिनमन चो बारे ने बिचारेंसे,
आउर आगे-जुगे चो बरकमन के सूरता करेंसे।
6 मय राती बेरा आपलो गीतमन के सूरता करेंसे;
आउर मने-मने धियान करुन हुनके नंगत ले समजतो बिचार करेंसे।
7 “काय, परभु अमदेया काजे छांडुन देयदे
आउर फेर हुन केबई हरिक नी होये?
8 काय, हुनचो सत-मया अमदेया काजे नोआय?
काय, हुनचो बायदा जुग-जुग काजे नोआय?
9 काय, महापरभु दया करुक भुलकलो?
काय, हुन रीस होउन जीव-दुखुक छांडलोसे?” निनास
10 तेबे मय बलले, “सबुले बड़े महापरभु चो सकत-हाथ मोचो उपर ले गुचली गुने
मय मुरमुरा होलेसे।”
11 मय जहोवा चो बुतामन के सांगेंदे;
आगे-जुगे तुय करलो अचरित बुतामन के पक्का सूरता करेंदे।
12 मय, तुचो करलो सपाय बुतामन के
आउर तुचो अचरित बुतामन चो बारे ने अमदेया बिचारेंदे।
13 ए महापरभु, तुचो बाट पवितर आय।
कोन देव-धामी आमचो महापरभु कटार माहान आय?
14 तुय ची अचरित बुता करु महापरभु आस;
तुय देस्-देस् चो लोगमन के आपलो सकत दखालीस।
15 तुय आपलो बांहा चो सकत ले, आपलो रयत
जाकूब आउर जूसुफ चो थर-लर के छंडालीस। निनास
16 ए महापरभु, समदूर तुके दखली,
आउर तुके दखुन डरली;
गड़िया समदूर बले थरथरली।
17 बादरी खुबे पानी घसराली;
आउर चड़लली;
फेर गुलाय बाटे पानी जागली।
18 लेहरा-धुका ने तुचो राग सुना दिली;
पानी जागतो के संवसार बरली,
मंजपुर थरथरली आउर हलली।
19 तुचो बाट समदूर बाटले रली,
तुचो बाट गड़िया पानी बाटले रली;
आउर तुय आपलो पांय-खोज नी छांडलीस।
20 मेंडा-गोहड़ी के बाट दखातो धोरई असन
तुय मोसा आउर हारून बाटले आपलो रयत के बाट दखालीस।