महापरभु आउर हुनचो लोग
मसकिल दीस ने आसाप चो भजन-गीत
78
ए मोचो लोगमन, मोचो सिखिया के सुना;मोचो गोटमन के कान डेरुन सुना।
2 मय कहनी-कटावमन ले सांगतो काजे मोचो टोंड उगाड़ेंदे:
मय आगे जुगे चो लुकलो भेदमन के सांगेंदे,
3 जोन गोटमन आमी सुनलुसे-जानलुसे,
आउर आमचो बाप-दादीमन आमके सांगलासे।
4 आमी हुन गोटमन के पिला-झीलामन ले नी लुकाउंदे,
मानतर एतो पीड़ी के जहोवा चो मयमा, सकत, आउर हुनचो अचरित बुतामन चो बारे ने सांगुंदे।
5 हुन तो जाकूब चो थर काजे गोटोक नियम दिलो,
आउर इसराएलिमन काजे नियम-कानुन दिलो,
जेचो बारे ने महापरभु आमचो बाप-दादीमन के हुकुम दिलो
ए गोटमन के आपलो पिला-झीलामन के सांगा
6 तेबे एतो पीड़ी एके जानोत,
बललोने, जोन पिलामन जनमदे,
हुनमन आपलाहान पिलामन के एचो बारे ने सिखाओत,
7 जेचोले हुनमन महापरभु उपरे भोरसा करदे,
आउर महापरभु चो अचरित बुतामन के नी भूलकदे,
मानतर हुनचो हुकुममन के मानते रदे;
8 आउर आपलो बाप-दादीमन असन नी होओत,
कसनबलले हुन पीड़ी चो लोग एरा आउर टेकाहा रओत,
हुनमन चो मन चमकट नी रली,
आउर हुनमन महापरभु पुरे पतेयातो लाईक नी रला।
9 एपरेमीमन, हतियार आउर धनु-कांडमन धरुन रले बले,
जुद बेरा पाट दखाउन पराला।
10 हुनमन महापरभु चो बायदा के नी मानला,
आउर हुनचो नियम-कानुन हिसाब ले नी चलुं बलला।
11 महापरभु करलो बड़े-बड़े बुतामन
आउर हुनचो दखालो अचरित बुतामन के हुनमन भूलकला।
12 हुन तो मिसर देस् चो सोअन भाटा ने
हुनमन चो बाप-दादीमन पुरे अचरित बुता दखाउ रये।
13 हुन, समदूर के दुय भाग करुन हुनमन के हुन पाट नहकालो,
आउर पानी के भीती असन उबालो।
14 हुन, दिन ने बादरी ढाकुन
आउर राती बेरा होला-उजर ले हुनमन के बाट दखालो।
15 हुन, छीड़ा-भाटा ने सिलपट के फुटाउन पानी बोहालो
आउर हुनमन के गड़ेया नंदी चो पानी असन मन-भरतले खुआलो।
16 हुन, सिलपट ले बले बुलका फुटालो,
आउर नंदीमन असन पानी बोहालो।
17 फेर बले हुनमन बारुसरा ने सबुले बड़े महापरभु चो हुकुम नी मानला,
आउर हुनचो बिरुद टेक धरुन आउर अदिक पाप करला।
18 हुनमन आपलो मन-भावतो खादी-पीदी मांगुन
मने-मने महापरभु के परखला।
19 हुनमन महापरभु चो खुद खादला,
आउर बलला “काय महापरभु छीड़ा-भाटा ने आमके खादी-पीदी देउक सके?
20 दखा! हुन, सिलपट के मारुन बुलका फुटाउन
पानी के नंदी असन बोहालो,
काय हुन, आपलो लोग के
रोटी आउर मास बले खुआउक सके?”
21 एके सुनुन जहोवा जंजाल रीस होलो;
आउर जाकूब उपरे आईग-फुटा रीस होलो,
बललोने, इसराएल उपरे बाय-बिकाल रीस होलो,
22 कसनबलले हुनमन महापरभु के मुरे नी पतेयाला,
आउर हुनचो छंडातो सकत उपरे भोरसा नी करला।
23 तेबले बले हुन, बादरी के हुकुम दिलो,
आउर सरग चो कपाट उगाड़लो;
24 हुनमन चो खातो काजे सरग चो अरन घसरालो,
बललोने, हुनमन के मन्ना खुआलो।
25 लोगमन के सरगदूतमन चो खादी-पीदी मिरली,
हुन, हुनमन के पुरुन-उरतले खुआलो।
26 हुन बेर उदिया बाटले बादरी ने लेहरा बोहालो,
आउर आपलो सकत ले बेर उदिया उजा बाटले लेहरा बोहालो;
27 हुन, उपर ले मास के धुरला असन
आउर समदूर चो बारु असन नी गनुक सकतो इतलो चड़ईमन घसरालो;
28 हुनमन चो डेरा मंजारे
आउर हुनमन चो तमु भोंवरक चड़ईमन घसरालो।
29 हुनमन पेट भरतले खादला,
असन करुन हुनमन चो मन-इछा के पुरा करलो।
30 हुनमन चो मुहड़ा-भागतो ले आगे,
टोंडे गरासक ची अरन-मास बाचलो बेरा,
31 महापरभु हुनमन उपरे बाय-बिकाल रीस होलो
आउर हुता चो बरसक-बरसक लोग के मोरालो,
बललोने, इसराएल चो जुवानमन के सत्यानास करलो।
32 इतलो होलो पाछे बले हुनमन पाप करते ची रला,
आउर महापरभु चो अचरित बुतामन के नी पतेयाला।
33 एईकाजे हुन, हुनमन चो दिनमन के फोकाहा चो मसागत,
आउर हुनमन चो जीवना के डर संगे कटालो।
34 हुनमन के नास करतो बेरा हुनमन पसताउन
खुबे मसागत ले महापरभु के डगराउक मुरियाला।
35 हुनमन के चेत चेगली कि महापरभु हुनमन चो सिलपट आय,
आउर सबुले बड़े महापरभु हुनमन चो छंडाउ परभु आय।
36 फेर बले हुनमन हुनचो इजित-धरला
आउर हुनचो ले फंद गोटेयाला।
37 कसनबलले हुनचो काजे हुनमन चो मन चमकट नी रये;
आउर हुनचो बायदा के सत नी पतेयाला।
38 मानतर हुन दया करु आय गुने
हुनमन चो ओधरम खेमा करलो
आउर हुनमन के नास नी करलो;
हुन घन-घन आपलो रीस के सितराते रयसे,
आउर आपलो जंजाल रीस नी दखाये।
39 हुन सूरता करलो कि एमन तो सोजे नास होतो जीव आत,
आउर बोहतो लेहरा असन आत जोन बोहड़ुन नी एये।
40 हुनमन खुबे हार छीड़ा-भाटा ने हुनचो बिरुद करला,
आउर हुनके बारुसरा ने मुरमुरा करला!
41 हुनमन घन-घन महापरभु के परखते रओत,
आउर इसराएल चो पवितर के मुरुसनाय करते रओत।
42 हुनमन हुनचो सकत के सूरता नी करला,
आउर बयरीमन चो हाथ ले छंडालो दिन के बले सूरता नी करला;
43 कसन बरन ले, मिसर ने हुन आपलो चीना दखाउ रये,
आउर सोअन भाटा ने आपलो अचरित बुता करु रये।
44 हुन तो मिसरीमन चो नंदीमन के लोउ उलटालो,
एईकाजे हुनमन आपलो नंदीमन चो पानी खाउक नी सकला।
45 हुन, हुनमन लगे आंदु-मोची गोहड़ी पठालो, जोन हुनमन के चाबला,
आउर मेंडकामन पठालो, जोन हुनमन चो नोकसान करला।
46 हुन, हुनमन चो उबज के चाटु-कीड़ामन के
आउर हुनमन चो मसागत चो फर के थापामन के खुआलो।
47 हुन, हुनमन चो अंगुर-डीरामन के करा ले,
आउर हुनमन चो डूमर रूकमन उपरे बड़े-बड़े करा-पकनामन घसराउन सत्यानास करलो।
48 हुन, हुनमन चो गाय-गोहड़ी के करा ले,
आउर छेरी-मेंडीमन उपरे बीज घसराउन सत्यानास करलो।
49 हुन, हुनमन उपरे आपलो जंजाल रीस,
आउर बाय-बिकाल रीस दखालो
आउर बिपती पाड़तो दूत गोहड़ामन पठालो।
50 हुन आपलो जंजाल रीस दखालो;
आउर हुनमन ले कोकई बले मोरना ले नी बचालो,
मानतर सपाय जीव-जनतुरमन के रबी उठाउन नास करलो।
51 हुन, मिसर चो सपाय पईलातमन के मोरालो,
जोनमन हाम* कुटुम चो पईलात बलेयारमन रला।
52 मानतर आपलो रयत के छेरी-मेंडीमन असन निकरालो,
आउर हुनमन के छेरी-मेंडी गोहड़ी असन छीड़ा-भाटा ने बाट दखालो।
53 हुन, हुनमन के नंगत ले बचाउन नीलो एईकाजे हुनमन के काई डर नी लागली;
मानतर हुनमन चो बयरीमन समदूर ने बुड़ून मोरला।
54 असन बरन ले हुन, हुनमन के पवितर देस चो संद ने अमरालो,
बललोने, हुन पवितर डोंगरी ने, जेके आपलो सकत ले जीतु रये।
55 हुन, जात-जात चो लोगमन के हुनमन चो पुरे ले खेदलो;
हुनमन चो भुंय-बाड़ी के बाटुन दिलो,
आउर हुनमन चो डेरामन ने इसराएली बंसमन के बसापत करालो।
56 फेर बले हुनमन, सबुले बड़े महापरभु के परखला,
आउर हुनचो बिरुद करला।
आउर हुनचो चेतानीमन के नी मानला,
57 मानतर आपलेई पुरखा-पाटी असन हुनके धोका दिला;
आउर टुटलो धनु असन उलटला।
58 कसनबलले हुनमन डेंग ठानमन* बनाउन हुनके रीस चेगाला,
आउर मूरतमन घड़ुन हुनचो मने ईरका उबजाला।
59 एईकाजे महापरभु बायबिकाल रीस होलो,
आउर इसराएल के एकदांय छांडुन दिलो।
60 हुन सीलोह ने आपलो रतो ठान के
बललोने, मनुकमन मंजी रलो आपलो तम्बु के छांडुन दिलो,
61 आउर महापरभु आपलो निज लोग के कमेया बुता ने पाड़लो,
आउर आपलो मयमा के बयरी चो हाथे करुन दिलो।
62 हुन आपलो रयत के खांडा ले मोरालो,
आउर आपलो निज लोग उपरे भारी रीस दखालो।
63 हुनमन चो जुवानमन आईग डसुन लाकड़ी उलटला,
आउर हुनमन चो कुंआरी लेकीमन चो बिया नी होली।
64 हुनमन चो पुजारीमन के खांडा ने मारला,
आउर हुनमन चो रांडीमन नी गागला।
65 तेबे परभु, झूमा ले कोनी चमकुन उठलो असन उठलो,
जसन कोनी बीर अंगुर मंद चो निसा ले बुकरुआय।
66 हुन आपलो बयरीमन के मारुन खेदलो;
अमदेया काजे हुनमन चो इजित बुड़ालो।
67 फेर हुन जूसुफ चो कुटुम के बले छांडलो,
आउर एपरेम चो बंस के नी बाछलो;
68 मानतर हुन, जहूदा चेई बंस के
आउर आपलो मन-भावतो सियोन डोंगरी के बाछलो।
69 हुता, हुन आपलो पवितर ठान के बादरी इतलो डेंग बनालो,
जेचो पाया मंजपुर असन अमदेया काजे चमकट मंडालोसे।
70 हुन आपलो कमेया दाउद के
छेरी-मेंडीमन चरातो थान ले बाछलो;
71 हुन, हुनके पिलाहारिन मेंडीमन चो पाट-पाट बुलतो थान ले आनलो
कि हुनचो रयत जाकूब बललोने, हुनचो निज लोग इसराएल चो रखेया करो।
72 एईकाजे दाउद, सत मन ले हुनमन चो रखेया करलो,
आउर आपलो नंगत बुद ले हुनमन के बाट दखालो।