राज के बचातो काजे पारथना
“मसकिल दीस” ने आसाप चो भजन-गीत
74
ए महापरभु, तुय काय काजे आमके अमदेया काजे छांडलीस?आउर काय काजे तुचो रीस चो कुमला, तुचो चरातो मेंडामन उपरे उठेसे?
2 तुय आगे ले मोल दिलो तुचो मंडली के
आउर आपलो लोग होतो काजे छंडालो बंस के सूरता कर;
सियोन डोंगरी के बले सूरता कर जोन थाने तुय रलीस।
3 खुबे दिन ले भोसड़लो मंदिर बाटे आपलो डांहका पकाव; बललोने, हुन पवितर मंदिर बाटे
जेके बयरीमन सत्यानास करलासे।
4 तुचो बयरीमन तुचो पवितर ठान ने अंदल-मतालासोत;
हुनमन आपलेई झंडामन के चीना काजे गाड़लासोत।
5 बीजबन-राने कुड़ार ने गोंदतो लोग असन
हुनमन गोंदसोत।
6 दखा, हुनमन मंदिर चो कारिगिरी के
कुड़ार आउर मुटलामन ने रन-बन करलासोत।
7 हुनमन तुचो पवितर मंदिर के डसाला;
बललोने, तुचो रतो ठान के भोसड़ाउन
असुद करला।
8 हुनमन आपलाहान मने बलसोत, “आमी एमन के एकदांय दबाउं”;
आउर हुनमन ए राज ने, महापरभु चो सपाय मंडलीमन के डसाला।
9 आमके काई अचरित चीना दखा नी देये;
एदांय कोनी बले अगमजानी नीआत,
कोनी नी जानुं, केबतले आमचो असनी ची गती रयदे।
10 ए महापरभु, बयरीमन कितरो दिन ले उबढंगरी बुता करते रदे?
काय, हुनमन अमदेया तुचो नाव चो इजित धरते रदे?
11 तुय आपलो उजा हाथ काय काजे नी उठायसीस?
तुचो हाथ के कोरा ले निकराउन हुनमन के सत्यानास कर।
12 महापरभु आगतले मोचो राजा आय,
हुन, मंजपुर ने मुक्ति चो बाट तियार करेसे।
13 तुय तो आपलो सकत ले समदूर के दुय भाग करलीस;
तुय तो मंगरमन चो मुंड के फुटालीस।
14 तुय तो लिबियातान* चो मुंड के
गोंदा-गोंदा करुन रान-जियादमन के खुआलीस।
15 तुय तो पजरा फुटालीस आउर झोड़ी बोहालीस;
तुय तो बारामासी बोहतो नंदीमन के सुकालीस।
16 मंजन तुचो आय, रात बले तुचेई आय;
बेर आउर जोन के बले तुय बनालीस।
17 तुय मंजपुर चो संदमन के बनालीस;
जेट आउर सीतकार के बले तुय ची बनालीस।
18 ए जहोवा, लेक कर, तुचो बयरीमन उबढंगरी बुता करसोत,
आउर एरामन तुचो नाव चो इजित धरसोत।
19 आपलो परेंया चो जीव के रान-जियादमन चो हाथे नी छांड;
गरीब-दुखीमन के अमदेया काजे नी भूलक।
20 आपलो बायदा के सूरता कर,
कसनबलले राज चो सपाय चिमचामनाय जगामन के हुनमन लड़ई-झगड़ा चो ठानमन बनालासे।
21 डाटा-टेवा ले नानागती होलो लोग के लाज पड़ुक नी देस;
गरीब-दुखीमन तुचो नाव चो जय-जय करोत।
22 ए महापरभु, उठ, आपलो नियाव-दाव लड़;
एरामन रात-मंजन तुचो इजित धरसोत, तुय हुनके लेक कर।
23 आपलो बयरीमन चो उबढंगरी बुतामन के नी भूलक;
हुनमन सरलगा तुचो बिरुद अंदल-मतायसोत।