तीसर भाग
(भजन 73–89)
सत नियाव करु महापरभु
आसाप चो भजन-गीत
73
सते, इसराएल काजेबललोने, सुद-मन लोगमन काजे महापरभु भला आय।
2 मानतर मय धोकड़ुन घसरतो असन होउ रयें,
मोचो पांय फिसलतेई असन होउ रये।
3 कसनबलले मय दुसटमन चो बाड़ती के दखुन
हुन गुमानीमन के कुचर होते रयें।
4 हुनमन के काई दुख-डंड नीआय;
हुनमन चो देहें बरसक आउर चेंग-चेंगा रयसे।
5 हुनमन के दुसर लोग असन तकलीस नी होये;
आउर दुसर लोग असन बिपती ने बले नी पड़ोत।
6 एईकाजे हुनमन गुमान के माला असन पींदलासे;
आउर उबढंगरी बुता के फटई असन ओड़लासे।
7 हुनमन चो आंईक-कानमन चमकेसे,
हुनमन चो मने फोकाहा बिचारमन उछरेसे।
8 हुनमन हांसी-खेली करसोत आउर कपट ले गोटेयायसोत;
हुनमन डरा-धमका करसोत।
9 हुनमन आपलो टोंड ले सरग चो बिरुद गोटेयायसोत,
हुनमनचेई गोट मंजपुर ने चलेसे।
10 एईकाजे लोगमन, हुनमन बाटे होयसोत आउर हुनमन चो जय-जय करसोत,
आउर हुनमन ने काई दोख नी दखसोत।
11 फेर दुसटमन बलसोत, “महापरभु कसन ने जानेदे?
काय, सबुले बड़े महापरभु के गियान आसे?”
12 दखा, दुसट लोग असन आत;
हुनमन अस्तिर ने रउन खुबे धन-माल कमायसोत।
13 सते, मय फोकाहा आपलो मन के सुद करलेसे
आउर आपलो हाथमन के धोउन दोख नोहलोर करलेसे।
14 कसनबलले मय रात-मंजन बिपती ने रले,
आउर रोजे बियान पावते खन डंड पावते रयें।
15 “मय दुसटमनचेई असन बलेंदे”, बलुन बिचारु रले
तेबे दख, तुचो पिलामन चो पीड़ी के धोका दिलो कटार होती।
16 जिदलदांय मय एके कसन समजेंदे बलुन बिचारले,
तेबे एके समजतोर मोके खुबे खट-खट लागली,
17 आउर जेबे मय महापरभु चो पवितर ठान ने गेले,
तेबे मय हुनमन चो सरासरी गती के जानले।
18 सते, तुय हुनमन के फिसलतो ठाने छांडसे,
आउर घसराउन सत्यानास करसे।
19 दखा, हुनमन डंडकीचे नास होउन मेटुन गेला
आउर डर काजे सत्यानास होला।
20 ए परभु! हुनमन, सोवलो बेरा दखलो सपना असन आत,
जेबे तुय उठसे हुनमन के छांय असन फोकाहा समजसे।
21 मोचो मन टुटली,
आउर मय मुरमुरा होउ रले।
22 मय तो एरा आउर भकवा रले;
मय तुचो पुरे पसु कटार रले।
23 तेबले बले मय अमदेया तुचेई संगे आंसे;
तुय मोचो उजा हाथ के धरलिसीस।
24 तुय सत बुद देउन मोके बाट दखासे,
आउर फेर, मयमा-मान देउन आपलो संगे संगासे।
25 तुके छांडुन सरग ने मोचो आउर कोन आसे?
तुके छांडुन मंजपुर ने मोके आउर काई नी भाये।
26 मोचो मन आउर देहें दुनो निमल होली,
मानतर महापरभु अमदेया मोचो सिलपट आउर मोचो बाटा आय।
27 तुचो ले लापी रतो लोग नास होदे,
तुके निंदरतो लोग के तुय सत्यानास करसे।
28 मानतर महापरभु संगे रतोर मोचो काजे नंगत आय,
मय जहोवा महापरभु चो सरन ने आंसे, जेचोले हुनचो सपाय बुतामन के सांगुक होओ।