धरमकारी राजा चो राजपाट
सुलेमान चो भजन-गीत
72
ए महापरभु, राजा के तुचो सत-नियाव,आउर राजा चो बेटा के तुचो धारनिक सिखिया सिखाव।
2 हुन, तुचो रयत चो नियाव धारनिक ले
आउर गरीब-दुखीमन चो नियाव सत ले करो।
3 डोंगरीमन आउर डेंग सीगमन बाटले लोगमन के
खुबे अस्तिर आउर धारनिक चो फर मिरो।
4 हुन, गरीब-दुखीमन चो सत-नियाव करो,
आउर नानागती लोग के साका होओ,
झीका-उड़मा करतो लोग के रमंदो।
5 बेर-जोन रओतले,
सपाय पीड़ी चो लोग राजा के डर संगे मानते रओत।
6 हुन, लाटा-बुटा चो खुटी उपरे घसरतो बरसा-पानी
आउर भुंय भिजातो भुरसी-पानी असन होओ।
7 हुनचो राज करतो बेरा धरमकारीमन चो बाड़ती होओ,
आउर बेर-जोन रओतले हुनमन अस्तिर ने रओत।
8 हुन, गोटोक समदूर ले धरुन दुसर समदूर अमरतले,
आउर महानंदी* ले धरुन मंजपुर चो चारो खुटे राज करो।†
9 सपाय बंस चो लोग हुनके पांय पड़ोत,
आउर हुनचो बयरीमन माटी के खाओत।
10 तरसीस आउर दुसर-दुसर ढिपकामन चो राजामन हुनचो काजे भेंट आनोत,
सेबा* आउर सबा थानो राजामन बले भेंट आनोत।
11 सपाय राजा हुनके डंडासरन करोत,
जात-जात चो लोग हुनचो हक ने होओत।
12 कसनबलले हुनके गुहारतो गरीब-दुखीमन के
आउर कोनी नोहलो लोग के हुन साका होयदे।
13 हुन, गरीब-दुखी लोगमन के जीव-दुखेदे,
आउर नानागती होलो लोगमन चो जीव के बचायदे।
14 हुन, हुनमन चो जीव के दुसट आउर उबढंगरी बुता करुमन ले छंडायदे,
कसनबलले हुनचो नंजर ने, हुनमन चो लोउ खुबे मोल चो आय।
15 राजा जुग-जुग जीव रओ!
सेबा थानो सोन हुनके देओत,
लोगमन हुनचो काजे सरलगा पारथना करते रओत,
आउर दिन भर हुनके धन-धन बलते रओत।
16 देस् ने खुबे अरन उबजो,
जेचो झोपामन, डोंगरी सिगमन ने लस-लसोत,
आउर लबानोन चो पाक-फर असन फरोत
आउर सहर चो लोग, भाटा चो रोंडा असन खुबे जन होओत।
17 हुनचो नाव जुग-जुग रओ,
बेर-जोन रओतले हुनचो नाव चो बाड़ती होते रओ।
हुनचो किरता सपाय जात-जात चो लोग भाइगमानी होओत,
सपाय लोग हुनके धन-धन करोत।
18 इसराएल चो जहोवा महापरभु धन-धन आय,
एकलाय हुनी ची अचरित बुतामन करुआय।
19 हुनचो मयमा-मान नाव, जुग-जुग काजे धन-धन रओ;
हुनचो मयमा ले गुलाय मंजपुर भरपुर होओ।
आमीन! आमीन।
20 जिसय चो बेटा दाउद चो पारथनामन सरली।