छंडावा काजे गोटोक सियान चो पारथना
71
ए जहोवा, मय तुचो सरन ने आंसे;मोके केबई लाज पड़ुक नी देस।
2 तुचो धारनिक किरता मोके छंडाव आउर बचाव;
मोचो बाटे धियान देउन मुक्ति देस।
3 तुय मोचो सरन धरतो सिलपट हो,
तेबे मय अमदेया तुचो सरन ने रउक सकेंदे,
कसनबलले मोचो सिलपट आउर भाड़ा तुय आस।
4 ए मोचो महापरभु, मोके दुसटमन,
उबढंगरीमन आउर कटुर लोगमन चो हाथ ले बचाव।
5 ए परभु जहोवा, मोके तुचेई उपरे आसा आसे,
पिलादांय ले मय तुचेई उपरे भोरसा करेंसे।
6 मोचो जनमते खन ले तुय मोके समालसीस;
मोचो आया चो पेट ले तुयचे मोके संवसार ने आनलीस।
मय सरलगा तुचेई जय-जय करते रयंदे।
7 मय खुबे लोग काजे अचरित बनलेसे,
मानतर तुय मोचो चमकट भाड़ा आस।
8 मोचो टोंड ले सरलगा तुचो जय-जय,
आउर रात-मंजन तुचो मयमा होते रयसे।
9 डोकरा होलो बेरा तुय मोके नी छांड;
निमल होलो बेरा मोके पाट नी कर।
10 सते, बयरीमन मोचो बिरुद गोटेयायसोत,
आउर मोचो जीव धरतो घत ने आसोत।
11 हुनमन सोर होउन बलसोत, “महापरभु तो हुनके छांडलोसे;
हुनके खेदुन धरूं,
कसनबलले हुनके बचातो काजे कोनी नीआत।”
12 ए महापरभु, मोचो ले लापी नी रा;
ए मोचो महापरभु, मोके साका होतो काजे झटके आव!
13 मोके बदी देउमन लाज पड़ोत आउर नास होओत;
मोचो नोकसान करुक डगराउमन
हसरित होउन बदी पाओत।
14 मानतर मय सरलगा तुचेई उपरे आसा करते रयंदे;
आउर तुचो खुबे जय-जय करते रयंदे।
15 तुचो धारनिक बुतामन
आउर तुचो दिलो मुक्ति चो बारे ने मय रोजे सांगते रयंदे,
तुचो बारे ने मय सांगुन पुरुक नी सकें।
16 मय, महापरभु जहोवा चो सकत बुतामन चो बारे ने जय-जय करते रयंदे,
मय सोजे तुचेई धारनिक चो बारे ने सांगेंदे।
17 ए महापरभु, तुय मोके पिलादांय ले सिखायसीस,
आउर एबतले मय तुचो अचरित बुतामन चो बारे ने सुनायंसे।
18 ए महापरभु, मय एतो सपाय पीड़ीमन के तुचो सकत चो बारे ने सुनाओतले
मय सियान होले नोहले मुंड पाकले बले मोके नी छांड।
19 ए महापरभु, तुचो धारनिक, बादरी टेकतो इतलो आगर आय।
तुय बड़े-बड़े बुतामन करलिसीस,
ए महापरभु, तुचो कटार कोन आसे?
20 तुय मोके खुबे दुख-तकलीस दिलीसीस,
मानतर एदांय फेर मोके जियासे;
आउर मंजपुर चो गड़ेया खोदरा ले
तुय मोके निकरासे।
21 तुय मोचो इजित-मान बड़ासे,
आउर फेर ले मोके अस्तिर करसे।
22 ए मोचो महापरभु, तुय पतेयातो लाईक आस,
मय सारंगी बजाउन-बजाउन तुचो सत चो जय-जय करेंदे;
ए इसराएल चो पवितर महापरभु,
मय किंदरी-बाजा बजाउन तुचो भजन गायंदे।
23 तुय मोचो जीव के बचालीस,
एईकाजे मोचो जीव आउर मोचो टोंड ले
मय हरिक चो जय-जय गीत गायंदे।
24 तुचो धारनिक बुतामन चो गोटबात मय रात-मंजन करेंदे,
कसनबलले जोनमन मोचो नोकसान करुक डगराते रला,
हुनमन चो आसा टुटली आउर लाज पड़ला।