बिपती ने पड़लो लोग चो गुहार
बजनेया मुखिया काजे, “सोसनीम* दीस” ने दाउद चो भजन-गीत
69
ए महापरभु, मय पानी-पुर ने बुड़ेंसे,मोके बचाव!
2 मय चिकल-लदी ने धसेंसे,
मोचो पांयमन ने काई धराव नीआय;
मय पानी-दराहां मंजारे फसलेसे,
आउर पानी-पुर ने बुड़ेंसे।
3 मय गागुन-गागुन थाकले;
मोचो टोंड सुकली।
महापरभु चो बाट दखते-दखते
मोचो आंईकमन अंधार पड़ली।
4 फोकाहा ने मोके बईर करतो लोग
मोचो चूंदी चो गनती ले बले आगर आसोत;
मोके नास करतो बयरीमन फंद बदी देउन मोके मोरते-मारतो काजे होयसोत,
हुनमन मोचोले खुबे सकत बीतामन आत।
एईकाजे जोन तीज के मय नी झीकले,
हुनके बले देउक पड़ली।
5 ए महापरभु, तुय तो मोचो एरा बुद के जानीस;
आउर मोचो पापमन तुचो ले नी लुकलीसे।
6 ए परभु, सेनामन चो जहोवा,
तुचो उपरे भोरसा करतो लोग चो आसा मोचो किरता नी टुटो;
ए इसराएल चो महापरभु,
तुके डगरातो लोग मोचो किरता लाज नी पड़ोत।
7 तुचेई किरता मय बदी पावले
आउर लाज काजे थमना नी दखायें।
8 मोचो भाईमन काजे मय “नोहड़ेया” होले,
मोचो घर-लोग मोके परदेसिया मानसोत।
9 तुचो घर चो भर ने मोचो जीव उखड़ली
आउर तुके देतो बदीमन मोचो उपरे पड़ली।
10 जिदलदांय मय गागुन आउर उपास करुन आपने तकलीस पावते रयें,
तेबे हुनचो काजे बले मोचो इजित धरला।
11 जिदलदांय मय टाट* ओड़ुन रयें,
तेबे मोचो सुआंग बनाला।
12 दुआरे बसुन लोगमन मोचो बारे ने गुरमुरते रओत
आउर मतवारमन मोचो बारे ने खुरलातो गीत गावते रओत।
13 मानतर ए जहोवा, मय तुचो ले पारथना करेंसे,
ए महापरभु, नंगत समया ने आपलो सत-मया ले मोके मुक्ति देस।
14 तुय मोके चिकल-लदी ले बचाव;
मोके आपलो बयरीमन ले
आउर पानी-दराहां ले बाचुक होओ।
15 मोके पानी-पुर बोहाउन नी नेओ,
पानी-दराहां ने बुड़ून मोरुक नी होओ,
आउर चिकल-खोदरा मोचो उपरे ढाकी नी होओ।
16 ए जहोवा, मोचो सुन, तुचो सत-मया खुबे नंगत आय;
आपलो खुबे दया हिसाब ले मोचो बाटे धियान देस।
17 तुय आपलो कमेया के नी छांड,
मय गराहां ने पड़लेसे, मोके झटके उत्तर देस।
18 मोचो लगे एउन मोके बचाव,
मोचो बयरीमन ले मोके छंडाव।
19 मोके बदी देतो के, लाज पड़ातो के आउर इजित धरतो के तुय दखलिसीस;
मोचो सपाय बयरीमन के तुय जानीस।
20 हिनस्ता ले मोचो मन टुटली,
एईकाजे मय खुबे मुरमुरा होले।
मय बलते रले, कोनी बले मोके जीव-दुखदे, मानतर कोनी जीव नी दुखला;
आउर मोके अस्तिर करुमन बले कोनी नी रला।
21 हुनमन मोके खातो काजे मोहरा दिला,
आउर पियास होलो बेरा अमटालो अंगुर रस खुआला।
22 हुनमन चो खादी-पीदी हुनमन काजे फांदा बनो;
आउर हुनमन चो सुख, हुनमन काजे सिरकी-फासी होओ।
23 हुनमन चो आंईक-कान अंधार पड़ो कि हुनमन काना होओत,
आउर हुनमन चो करांड अमदेया थरथरते रओ।
24 हुनमन उपरे आपलो रीस दखाव,
आउर तुचो बाय-बिकाल रीस हुनमन उपरे पड़ो।
25 हुनमन चो तमुमन उजड़ो
हुनमन चो तमुमन ने कोनी डेरा नी पड़ोत।
26 कसनबलले जेके तुय डंड दिलीस, हुनमन हुनकेई डाटा-टेवा करसोत,
आउर जेके तुय अदमड़ा करलीस हुनमन हुनकेई टेचरायसोत।
27 हुनमन चो ओधरम पलटा, हुनमन चो डंड के आउर बले बड़ाव;
कि हुनमन तुचो बाटले मुक्ति पाउक नी सकोत।
28 हुनमन चो नाव जीवन चो किताप ले मेटाव;
आउर धरमकारीमन संगे हुनमन चो नाव नी रओ।
29 मानतर मय तो निमल आउर दुख-तकलीस ने आंसे;
ए महापरभु, तुय मोके बचाउन रखेया कर।
30 मय गीत गाउन-गाउन महापरभु चो जय-जय करेंदे;
आउर धन-धन करते हुनचो बड़ाई करेंदे।
31 एके जहोवा, बयला
बललोने, सींग आउर खुर बिती संड ले बले आगर मन करेदे।
32 एके दखुन नानागती होलो लोग हरिक होओत;
ए महापरभु के डगरातो लोग, तुमचो मन हरिक-उदीम होओ।
33 जहोवा गरीब-दुखी चो सुनुआय
आउर कयद ने रतो, आपलो लोग के हिनस्ता नी करे।
34 सरग आउर मंजपुर हुनचो जय-जय करोत,
समदूर आउर हुन थाने रतो सपाय जल-जनतुरमन बले।
35 कसनबलले महापरभु सियोन के बचायदे
आउर जहूदा चो सहरमन के फेर बनायदे;
आउर हुनचो कमेयामन हुता रउन बसापत करदे।
36 हुनचो कमेयामन चो थर हुता चो हकदार होदे,
आउर हुनचो नाव के मया करतो लोग हुताय रदे।