इसराएलिमन, आपलो बयरीमन के जीततोर
बजनेया मुखिया काजे दाउद चो भजन-गीत
68
महापरभु उठो, हुनचो बयरीमन ए बाटे-हुन बाटे भिड़कोत;हुनचो बिरुद करुमन हुनचो पुरे ले पराओत।
2 हुनमन के कुमला उड़लो असन उड़ाउन देस;
आईग चड़काले मोमबती उतलो असन
दुसट लोग महापरभु चो पुरे नास होओत।
3 मानतर धरमकारी हरिक होओत;
आउर महापरभु चो पुरे हरिक-उदीम होओत;
हुनमन हरिक चो भर ने रओत।
4 महापरभु काजे गीत गाहा, हुनचो नाव चो जय-जय गीत गाहा;
जोन, बादरी ने बसुन एयसे, हुनचो काजे गीत गाहा—
हुनचो नाव जहोवा आय,
एईकाजे हुनचो पुरे हरिक-उदीम होआ।
5 महापरभु पवितर ठाने बललोने, आपलो रतो ठाने पोरटा-पोसरमन चो बुआ आय
आउर रांडीमन चो रखेया करु महापरभु आय।
6 महापरभु, एकलाय रतो लोग चो थर मंडायसे;
हुन कयदीमन के छंडाउन बाड़ती करायसे,
मानतर एरामन के बारुसरा-भाटा ने रउक पड़ेदे।
7 ए महापरभु, जिदलदांय तुय आपलो रयत चो पुरे-पुरे,
छीड़ा-भाटा बाटले हिंडते गेलीस। निनास
8 तेबे भुंय-डोल होली आउर बादरी, पानी घसराली
सिनाई डोंगरी चो महापरभु पुरे
हव, इसराएल चो महापरभु चो पुरे।
9 ए महापरभु, तुय गुलाय बाटे खुबे पानी घसरालीस;
तुचो निज-बाटा सुकुन रली, मानतर तुय हुनके लस-लसा करलीस;
10 तुचो रयत हुता बसापत करला;
ए महापरभु, तुय भलई करुन हुनमन के लागतो तीजमन दिलीसीस।
11 परभु हुकुम देयसे;
आउर नंगत खबर सुनातो बायलेमन खुबे आसोत:
12 “सेना संगे राजामन परायसोत, हव, लिलि-बांडा परायसोत!”
आउर झीका-उड़मा करलो धन के, घर चो बायलेमन बाटेसोत।
13 मेंडा-कोटा ने घोंडरलो लोग के बले हुनचो बाटा मिरेसे
हुनीमन ने रूपा चो झकमकतो पाटकीमन,
आउर सोन ले घड़लोर परेंयामन आसे।
14 जेबे सबुले सकत महापरभु सपाय राजामन के भिड़कालो,
तेबे हुनमन सलमोन डोंगरी ने करा घसरलो असन ए बाटे-हुन बाटे पराला।
15 बासान चो डेंग डोंगरी, महापरभु चो डोंगरी आय;
ए बासान डोंगरी ने खुबे सीगमन आसे!
16 ए खुबे सीग बीती डोंगरी, महापरभु रउक मन करतो डोंगरी के,
तुय काय काजे गरेया-गरेया दखसीस,
बललोने, सियोन डोंगरी के, जोन थाने जहोवा जुग-जुग काजे रयदे?
17 महापरभु चो रथमन हजारो-हजारो,
कोटी-कोटी आसे,
जसन परभु सिनाई पवितर ठान ने आसे, उसनेची हुन, हुनमन चो मंजारे आसे।
18 तुय डेंग डोंगरी ने चेगलीस,
लोगमन के आपलो हक ने करलीस
तुय लोगमन ले
आउर हुता रतो एड़जामन ले बले भेंट धरलीस कि जहोवा महापरभु हुनमन चो मंजारे रओ।
19 धन-धन आय परभु,
जोन रोजे-दिना आमचो बोजा उठायसे;
हुनी आमचो मुक्ति देउ महापरभु आय। निनास
20 आमचो महापरभु, मुक्ति देउ महापरभु आय,
आउर जहोवा महापरभु ची आमके मोरना ले बचाउआय।
21 मानतर महापरभु, आपलो बयरीमन के,
आउर ओधरम बुता करुमन चो मुंड के मारुन-मारुन बिल-बिला करेदे।
22 परभु बललो,
“मय तुचो बयरीमन के बासान ले बोहड़ाउन आनेंदे,
मय हुनमन के गड़ेया समदूर ले निकराउन आनेंदे
23 कि तुय आपलो बयरीमन चो लोउ ले पांय धोउक सक,
आउर तुचो बयरीमन, तुचो कुकुरमन चो बाटा होओत।”
24 ए महापरभु, तुय आपलो रयत संगे एतो के लोगमन दखला,
मोचो महापरभु आउर मोचो राजा के, पवितर ठान ने एतो के दखला—
25 पुरे-पुरे गावतो लोग आउर पाट-पाट किंदरी बाजा बजातो लोग गेला,
हुनमन चो मंजी कुंआरी लेकीमन डफली बजाते रओत:
26 “तुमी इसराएल चो थर-लर आहास,
मंडलीमन ने जहोवा महापरभु चो धन-धन करा!”
27 हुता हुनमन चो मुखिया नानी बिनयामीन आय,
हुता जहूदा चो राजपालमन आपलो लोगमन संगे आसोत,
हुता जबूलून आउर नपताली चो राजपालमन बले आसोत।
28 ए महापरभु, हुकुम देस आउर आपलो सकत दखाव;
ए महापरभु, जोन बले तुय आमचो काजे करलिसीस, हुनके चमकट कर।
29 जरूसलेम ने तुचो मंदिर रलो किरता,
राजामन तुचो काजे भेंट आनदे।
30 मिसर देस्* के,
तुचो बयरीमन के आउर जात-जात चो लोगमन के तुय दागा देउन डराव।
देस्-देस् चो लोगमन के रमंद, जोनमन रूपा चो भेंट चो लालच करसोत;
जोनमन लड़ई ले हरिक होयसोत, हुनमन के ए बाटे-हुन बाटे भिड़काउन देस।
31 मिसर देस चो दूतमन कांस आनोत;
कूस देस चो लोगमन, महापरभु बाटे झटके आपलो हाथ पसारोत।
32 ए मंजपुर चो राज-राज चो लोगमन, महापरभु काजे गीत गाहा,
परभु काजे जय-जय गीत गाहा। निनास
33 जोन जुग-जुग ले बादरी ने बसुन जायसे;
दखा, हुन आपलो बचन सांगेसे, हुनचो बचन ने खुबे सकत आसे।
34 महापरभु चो सकत चो जय-जय करा,
हुनचो राजपाट इसराएल उपरे ढाकलीसे;
आउर हुनचो सकत बादरी उपरे दखा देयसे।
35 ए महापरभु, इसराएल चो महापरभु,
हुन आपलो पवितर ठान ने डरतो लाईक आसे;
हुनीची आपलो रयत के सकत आउर बल देयसे।
महापरभु धन-धन आय!