महापरभु भलई करलो काजे जय-जय गीत
बजनेया मुखिया काजे भजन-गीत
66
ए मंजपुर चो सपाय लोगमन, बड़े राग ले महापरभु चो जय-जय करा;2 हुनचो नाव चो मयमा चो भजन-गीत गाहा;
जय-जय करते हुनचो मयमा करा।
3 महापरभु के बला, “तुचो बुतामन खुबे भक्यातो लाईक आय!
तुचो खुबे सकत किरता बयरीमन आपने के तुचो हक ने सोपदे।
4 मंजपुर चो जमाय लोग तुके डंडासरन करसोत;
आउर तुचो जय-जय गीत गायसोत;
हुनमन तुचो नाव चो भजन-गीत गायसोत।” निनास
5 इआ, महापरभु चो बुतामन के दखा:
लोगमन चो मंजारे हुन अचरित बुतामन करलोसे।
6 हुन, समदूर के सुकलो भुंय उलटालो;
आउर हुनमन बड़े नंदी के हिंडते नाहकला।
हुता आमी हुनचो किरता हरिक होलु,
7 हुन आपलो सकत ले अमदेया राज करेसे,
आउर हुनचो आंईकमन जात-जात चो लोग के दखते रयसे
कि टेकाहामन गुमान करुक नी सकोत। निनास
8 ए देस्-देस् चो लोगमन, आमचो महापरभु चो धन-धन बला,
सपाय सुनोत ले हुनचो जय-जय बड़े राग ले गाहा,
9 हुन आमचो जीव चो रखेया करेसे,
आउर आमके घसरुक नी देये।
10 कसनबलले ए महापरभु, तुय आमके जाचलीस;
आमके ताव दिलो रूपा असन परखलीस।
11 तुय आमके फांदा ने फसालीस;
आमचो उपरे खुबे बोजा तेंगड़लीस।
12 तुय आमके बयरीमन ले रमंदालीस;
आमके आईग आउर पानी मंजिगता ले जाउक पड़ली;
फेर बले तुय आमके अस्तिर चो ठान ने अमरालीस।
13 मय तुचो पवितर मंदिर ने होम-जतरा चेगाउक एयंदे;
तुचो काजे हुन बोदनामन के चेगायंदे,
14 जेचो बारे ने मय सांगुन रयें
आउर जोन बोदनामन मोचो बिपती बेरा मय बोउ रयें।
15 मय तुचो काजे ठोसर जनावरमन के
मेंडामन चो बसील संगे होम-जतरा चेगायंदे;
बयलामन आउर बोकड़ामन के जतरा चेगायंदे। निनास
16 महापरभु के मानतो सपाय लोगमन एउन सुना,
मय सांगेंदे, हुन मोचो काजे काय-काय करलोसे।
17 मय हुनके बड़े राग ले हागदिले,
आउर हुनचेई गुन गावले।
18 मोचो मने कपट रलोने
परभु मोचो गुहार नी सुनतो।
19 मानतर महापरभु सते मोचो गुहार सुनलोसे;
हुन मोचो पारथना उपरे धियान दिलोसे।
20 महापरभु धन-धन आय,
कसनबलले हुन मोचो पारथना सुनलो
आउर मोके सत-मया करुक नी छांडलो।