महापरभु चो धन-धन करतोर
बजनेया मुखिया काजे दाउद चो भजन-गीत
65
ए महापरभु, सियोन डोंगरी नेजय-जय तुचो बाट दखेसे;
आउर आमी बोअलो बोदना तुके चेगाउंदे,
2 ए पारथना सुनतो महापरभु!
सपाय लोग तुचेई लगे एदे।
3 आमचो भीतरे ओधरम बाड़लीसे,
तुय आमचो पापमन के खेमा कर।
4 धन-धन आय हुन, जेके तुय बाछुन
आपलो दुआरे रउक देयसीस।
तुचो पवितर मंदिर चो
नंगत-नंगत तीजमन ले आमचो मन भोरेदे।
5 ए आमचो मुक्ति-देउ महापरभु,
धारनिक ले करलो अचरित बुतामन बाटले तुय आमचो मन भावतो बर देयसीस;
मंजपुर चो सपाय लोगमन
आउर समदूर चो हुन पाट रतो लोगमन चो आसा बले तुय ची आस।
6 तुय आपलो सकत ले,
डोंगरीमन के आपलो ठान ने चमकट करलीस।
7 तुय समदूर चो गरजन,
हलकामन चो खुबे गरजन,
आउर जात-जात चो लोगमन चो कोलार के चिमनाय करसीस।
8 एईकाजे लापी-लापी देस् ने रतो लोगमन तुचो अचरित बुतामन के दखुन डरला,
तुय बेर उदिया आउर बेर बुड़ती, दुनो बाटले हरिक ले जय-जय करायसीस।
9 तुय भुंय के धियान देउन पानी-बरसा करायसीस,
आउर हुनके खुबे खतउ बनायसीस;
महापरभु चो नंदी ने खुबे पानी आसे;
तुय भुंय के तियार करुन
लोगमन काजे अरन उबजायसीस।
10 जोपलो भुंय ने तुय पानी झपायसीस,
ढेलामन के सलमट करसीस,
पानी ले भुंय के गुलगुला करसीस,
आउर हुनचो उबज ने बर देयसीस।
11 तुय आपलो भलई ले बरक के जेट, चमास आउर सीत देउन सजारसीस;
तुचो बाटमन ने नंगत-नंगत तीजमन भरपुर आसे।
12 बंजरा भुंय लस-लसा रोंडा ले भोरलीसे,
आउर डोंगरीमन बले खुबे हरिक होलासे,
13 चारा-भाटा ने छेरी-मेंडीमन भोरलासे,
आउर बेड़ा-खाड़ामन ने भरपुर अरन होलीसे,
हुनमन बले हरिक ले जय-जय चो गीत गायसोत।