बयरीमन ले रखेया काजे गुहार
बजनेया मुखिया काजे दाउद चो भजन-गीत।
64
ए महापरभु, मय तुके गुहारतो बेरा तुय मोचो सुन;मोके डरा-धमका करतो बयरीमन ले मोचो जीव चो रखेया कर।
2 ओधरमीमन चो कपट उआट ले
आउर उबढंगरी बुता करुमन ले मोके बचाव,
3 हुनमन आपलो जीब के खांडा असन निसलासे,
आउर आपलो कटुर गोटमन के कांड असन झोकेयालासे,
4 कि चोखा लोग के बिंदोत;
आउर उधापड़े डर नोहलोर हुनमन चो नोकसान बले करसोत।
5 हुनमन अडरा बुता करतो घत ने रयसोत;
आउर फांदा मंडातो काजे सोर होयसोत,
आउर बलसोत, “आमके कोन दखदे?
6 कोन आमचो उबढंगरी बुतामन के जानुक सके?”
हुनमन बलसोत, “आमी पक्का उआटमन चलाक ले करलुसे।”
कसनबलले मनुक चो मन-बिचार के कोनी जानुक नी होये।
7 मानतर महापरभु हुनमन के कांड ने बिंदेदे;
आउर हुनमन के उधापड़े घाव-दाव होयदे।
8 हुनमन आपलेई गोट किरता धोका खादे;
आउर हुनमन के दखतो सपाय लोग भक्याउन डरदे।
9 तेबे सपाय लोग महापरभु के डरुन
हुनचो अचरित बुतामन के सांगदे,
आउर हुनचो करलो सपाय बुतामन चो बारे ने बिचारदे।
10 धरमकारी लोग जहोवा किरता हरिक होओत
आउर हुनचो सरन ने एओत।
सपाय सोज लोग हुनचो जय-जय करा।