महापरभु ची बचाउआय
बजनेया मुखिया काजे “जदूतून दीस” ने दाउद चो भजन-गीत
62
मय धीरजा ले महापरभु चो बाट दखेंसे;हुनी मोके मुक्ति देउ महापरभु आय।
2 हुनी चे मोचो सकत सिलपट आउर मोचो मुक्ति देउ महापरभु आय,
हुन मोचो रखेया करु भाड़ा आय, मय चमकट रयंदे।
3 मय तो भोसड़तो ओवासी नोहले लोंडतो बाड़ी असन आंय
तुमी कितलो दिन ले
मोके मोरते मारतो घत ने राहासे?
4 सते हुनमन, मोके बड़े पन ले घसरातो उआट करसोत,
हुनमन फंद ले हरिक होयसोत;
हुनमन टोंड ले तो बर देयसोत,
मानतर मने-मन सरापते रयसोत। निनास
5 ए मोचो जीव, महापरभु उपरे ची भोरसा कर,
कसनबलले मोचो आसा हुनचेई ने आसे।
6 सते, हुनी चे मोचो सकत सिलपट आउर मोके मुक्ति देउ महापरभु आय,
हव, हुनी मोचो रखेया करु भाड़ा आय, एईकाजे मय चमकट रयंदे।
7 मोचो मुक्ति आउर मोचो मयमा, महापरभु आय;
हुनी मोचो सकत सिलपट आउर लुकतो ठान आय।
8 ए लोगमन, अमदेया हुनचो उपरे भोरसा करा;
हुनके आपलाहान मन चो सपाय गोट सांगा;
महापरभु ची आमचो लुकतो ठान आय। निनास
9 लोग तो धराव नोहलोर आत,
आउर बड़े सवकार लोग फंदी आत;
तोहलोने हुनमन पोय-पोया आत;
हुनमन सपाय, फुंडा-लेहरा इतलो बले बजन नीआत।
10 ठगा-फारसी करतोने मन नी लगाहा,
आउर झीका-उड़मा करतोने गुमान नी करा;
धन-माल खुबे बाड़लोने बले हुनचो भोरसा ने नी राहा।
11 महापरभु गोटोक हार बललोसे;
आउर मय दुय हार सुनलेसे:
सकत, महापरभुचेई आय।
12 ए परभु, सत-मया बले तुचेई आय,
तुय सपाय के हुनमन चो बुता हिसाब ले पलटा देयसीस।