छंडावा काजे गुहार
बजनेया मुखिया काजे “सूसन-एदूत” दीस ने दाउद चो मिक्ताम। ए गोटोक सिखानी गोट आय। जिदलदांय हुन आराम-नहरेम आउर आराम-सोबह ले लड़लो आउर जोआब, लोन चो घाटी ने बारा हजार एदोमीमन के मारलो।
60
ए महापरभु, तुय आमके छांडुन दिलीस; आमचो भाड़ामन के सत्यानास करलीस; आउर आमके रीस होलीस;मानतर एदांय आमके फेर ले बसापत कर।
2 तुय भुंयडोल करालीस आउर डांगरा फुटालीस;
हुन डांगरामन के भोरुन देस, कसनबलले हुन भोसड़ेसे।
3 तुय आपलो रयत के खुबे भुगतालीस;
तुय आमके माततले अंगुर-रस खुआलीस।
4 तुके मानतो लोग के तुय गोटोक झंडा दिलीस
कि हुनमन बयरीमन ले बाचुक सकोत। निनास
5 तुय आमचो गुहार सुनुन आपलो उजा हाथ ले आमके बचाव
कि तुचो मया करतो लोग चो छंडावा होओ।
6 महापरभु आपलो पवितर मंदिर ले बचन दिलो:
“मय हरिक ले सकेम के बाटेंदे
आउर सुकोत घाटी के नापेंदे।
7 गिलाद मोचो आय; मनसे बले मोचोई आय;
एपरेम मोचो लोहा-टोप
आउर जहूदा मोचो राज-गुबा आय।
8 मोआब मोचो धोअतो पातली आय;
एदोम उपरे मय आपलो पनई पकायंदे†;
मय पलिस्तीन के हराउन जीत चो जय-जय गीत गायंदे।”
9 भाड़ा बिती सहर ने मोके कोन अमरायदे?
कोन मोके एदोम चो बाट दखायदे?
10 ए महापरभु, काय तुय आमके नी छांडलीस?
ए महापरभु, तुय आमचो सेनामन संगे नी जायीस?
11 बयरीमन के हरातोने आमके साका हो,
कसनबलले मनुक साका होतोर फोकाहा आय!
12 महापरभु चो सकत ले आमी अचरित बुता करुंदे;
हुनी आमचो बयरीमन के रमंदेदे।†