रखेया काजे पारथना
बजनेया मुखिया काजे “अल-तसहेत*” दीस ने दाउद चो मिक्ताम। जिदलदांय साउल चो पठालो लोगमन दाउद के मोरते मारतो काजे घर चो भोंवरक बेड़ु रओत।
59
ए मोचो महापरभु, मोके बयरीमन ले छंडाव;मोके डाटा-टेवा करुमन ले मोके बचाव।
2 ओधरमीमन चो हाथ ले मोके छंडाव;
आउर माने मारामन ले मोके बचाव।
3 ए जहोवा दख, हुनमन मोके मोरते मारतो घत ने आसोत;
कसनबलले मय दोख नोहलो आंय आउर काई पाप नी करलेसे,
तेबले बले झगड़ाहामन मोचो बिरुद रूंडेसोत।
4 दोख नोहलोर हुनमन मोचो उपरे एयसोत।
उठ आउर दख, मोके साका होतो काजे झटके आव!
5 ए सेनामन चो जहोवा महापरभु, ए इसराएल चो महापरभु,
सपाय जात-जात चो लोगमन के डंड देतो काजे उठ;
धोका देउ ओधरमीमन उपरे मुरे दया नी कर। निनास
6 हुन ओधरमीमन रोजे सांज बेरा एउन
कुकुरमन असन नरेयाते-नरेयाते
सहर चो भोंवरक किंदरते रयसोत।
7 दख, हुनमन धमकायसोत,
हुनमन खांडा ले मारलो असन गोट गोटेयायसोत;
आउर बलसोत, “आमचो गोट कोन सुनेसे?”
8 मानतर ए जहोवा, तुय हुनमन के हांसुन पकासे;
तुय सपाय जात-जात चो लोगमन के लाज पड़ासे।
9 ए मोचो सकत, मोके तुचेई उपरे भोरसा आसे;
ए मोचो महापरभु, तुय मोचो डेंग भाड़ा आस।
10 मोचो महापरभु आपलो सत-मया ले मोके भेट होयदे;
मोचो महापरभु बयरीमन के हरातोने मोचो मन-इछा पुरा करेदे।
11 ए परभु, ए आमचो ढाल!
तूरते हुनमन के मोरते नी मार, मानतर तुचो सकत ले हुनमन के भिड़काव आउर डराव;
नोहले मोचो रयत भूलकुन जादे।
12 हुनमन आपलो टोंड चो पाप आउर ओटमन चो गोट किरता,
आपलो गुमान ने धरा पड़ोत।
हुनमन चो सरापतो आउर फंद गोट किरता
13 आपलो बायबिकाल रीस ले
हुनमन के सत्यानास कर कि हुनमन चो बंस बुड़ो।
तेबे संवसार चो कोना-कोना चो लोग जानदे
महापरभु, जाकूब उपरे राज करेसे। निनास
14 हुन ओधरमीमन रोजे सांज बेरा बोहड़ुन
कुकुरमन असन नरेयाते-नरेयाते
सहर चो भोंवरक किंदरते रयसोत।
15 हुनमन खादी-पीदी काजे एता-हुता बुलते रयसोत,
आउर नी मिरले रीस काजे दात कडरेसोत।
16 मानतर मय तुचो सकत चो बड़ाई करेंदे;
मय बड़े बियाने, तुचो सत-मया चो जय-जय गीत हरिक ले गायंदे।
कसनबलले बिपती बेरा तुय मोचो रखेया चो ठान
आउर मोचो डेंग भाड़ा आस।
17 ए मोचो सकत, मय तुचो भजन गायंदे,
कसनबलले ए महापरभु, तुय मोचो डेंग भाड़ा आस,
आउर मोके सत-मया करु महापरभु आस।