दुसट के डंड देतो काजे पारथना
बजनेया मुखिया काजे अल-तसहेत दीस ने दाउद चो मिक्ताम
58
ए मनुकमन, काय सते तुमी धरम चो गोट गोटेयायसाहास?ए मुखियामन, काय तुमी सत-नियाव करसाहास?
2 नाई, तुमी मने-मने कपट बिचार करसाहास,
तुमी इसराएल देस् ने लड़ई-झगड़ा करसाहास।
3 दुसटमन जनमते खन आपलो लोग ले खुड़ेसोत,
पिलादांय ले हुनमन फंद गोटेयाउन-गोटेयाउन बाट भुलकसोत।
4 हुनमन चो टोंडे साप असन बीस आसे,
आउर नी सुनतो नाग साप असन आत
5 आउर साप बीता कितलेही बीन बजाले बले,
हुनचो मुरे नी सुनोत।
6 ए महापरभु, हुनमन चो टोंड ले दातमन के टुटाव;
ए जहोवा, जुवान बीजापुलिया बागमन चो सूरिया-सूरिया दातमन के उखनुन पकाव!
7 बोहतो पानी आटलो असन हुनमन मेटुन जाओत;
हुनमन चो झोकेयालो कांड भोबड़ा होओ।
8 हुनमन घुली असन गलते जाओत,
आउर बायले चो उतरलो पिला असन होओत जोन, बेर के केबई नी दखे।
9 तुमचो हांडीमन के भड़-भड़तो आईग चो आंच पावतो ले आगे,
काचा आउर पाकलो दुनो के महापरभु उड़ाउन नेयदे!
10 असन पलटा धरतो के दखुन धरमकारी हरिक होयदे;
आउर दुसट चो लोउ ने आपलो पांयमन धोयदे।
11 तेबे लोगमन बलदे: “धरमकारी के इनाम मिरेदे ची;
महापरभु सते आसे, हुन मंजपुर चो नियाव करुआय।”