छंडावा काजे गुहार
बजनेया मुखिया काजे “अल-तसहेत” दीस ने दाउद चो मिक्ताम; जिदलदांय हुन साउल चो डर काजे करपन ने लुकुन रये।
57
ए महापरभु, मोचो उपरे दया कर, मोचो उपरे दया कर,कसनबलले मय तुचो सरन ने ईलेसे;
सपाय बिपतीमन सरतले
मय तुचो पाटकी आड़े सरन धरेंदे।
2 सबुले बड़े महापरभु के मय हागदेयंदे,
हुन महापरभु के, जोन मोचो काजे सपाय बानी पुरा करुआय।
3 महापरभु सरग ले साहरा होउन मोके बचायदे,
मोके रमंदतो लोग के हुन लाज पड़ायदे। निनास
महापरभु आपलो सत-मया आउर सत के पठायदे।
4 मोचो जीव गराहां ने पड़लीसे, बीजापुलिया-बागमन मोचो भोंवरक बेड़लासे
जोनमन मनुकमन के धरुन खायसोत;
हुनमन चो दातमन, भालामन आउर कांडमन असन आसे
आउर हुनमन चो जीबमन निसलो खांडामन असन आसे बललोने, मय असन मनुकमन चो मंजी आंसे।
5 ए महापरभु, तुय सरग उपरे खुबे माहान आस;
तुचो मयमा गुलाय मंजपुर ने बिगरो!
6 हुन दुसटमन मोके फसातो काजे फांदा मंडाला;
मोचो जीव के मुरमुरा लागली।
हुनमन मोचो काजे खोदरा खोड़ला,
मानतर हुनमन आपने हुन खोदरा ने घसरला। निनास
7 ए महापरभु, मोचो मन चमकट आसे,
मोचो मन चमकट आसे।
मय गायंदे, हव, तुचो जय-जय गीत गायंदे।
8 ए मोचो जीव, चेत!
ए सारंगी आउर ए किंदरी बाजा उठा!
मय बले बियान पावतोले आगे उठेंदे!†
9 ए परभु, राज-राज चो लोगमन मंजी मय तुचो धन-धन करेंदे;
जात-जात चो मंजी मय तुचो जय-जय गीत गायंदे।
10 कसनबलले तुचो सत-मया सरग उपरे,
आउर तुचो सत, बादरी के टेकलीसे।
11 ए महापरभु, तुय सरग उपरे खुबे माहान आस!
तुचो मयमा गुलाय मंजपुर ने बिगरो।†