छंडावा काजे गुहार
बजनेया मुखिया काजे “जोतन-एलेम-रहोकीम” *दीस ने दाउद चो मिक्ताम, जिदलदांय पलिस्तीमन हुनके गत सहर ने धरुन रला।
56
ए महापरभु, मोचो उपरे दया कर, कसनबलले मनुकमन मोके सत्यानास करुक मन करसोत;आउर रात-मंजन लड़ुन-लड़ुन मोके डाटा-टेवा करसोत;
2 मोचो बयरीमन मोके रात-मंजन रमंदसोत,
आउर मोचो बिरुद लड़तो ने गुमान करुमन खुबे आसोत।
3 ए सबुले बड़े महापरभु, मोके डर लागतो बेरा,
मय तुचो उपरे भोरसा करेंदे।
4 मय महापरभु चो बचन चो बड़ाई करेंसे,
मय महापरभु उपरे भोरसा करेंसे; मय नी डरें;
काय, कोनी मोके काई नोकसान करुक सके?
5 हुनमन अमदेया मोचो ने नीस डगरायसोत;
हुनमन चो सपाय बिचार मोचो नोकसान काजे ची आय।
6 हुनमन जुहुन घत ने लुकुन रयसोत,
आउर मोचो इआर-जाहार होतो के दखते रयसोत।
हुनमन मोचो जीव धरतो घत ने आसोत,
7 एईकाजे हुनमन चो ओधरम चो पलटा हुनमन के देस;
ए महापरभु, तुचो बायबिकाल रीस ले हुनमन के नास कर!
8 मोचो दुख-तकलीस ले बुलतो हिसाब तुचो लगे आसे;
मोचो आंसु के तुचो कुपी ने भोरुन संगाव।
काय, एचो बारे ने तुचो किताप ने नी लिखलोर आसे?
9 जिदलदांय मय तुके हागदेयंदे
हुदलीदांय मोचो बयरीमन बोहड़ुन परादे।
मय जाने, महापरभु मोचो पाटेया आसे।
10 मय महापरभु चो बचन चो बड़ाई करेंसे,
मय जहोवा चो बचन चो बड़ाई करेंसे,
11 मय महापरभु उपरे भोरसा करेंसे; मय नी डरें।
काय, कोनी मोचो काई नोकसान करुक सके?
12 ए महापरभु, मय तुचो पुरे बोअलो बोदना चेगायंदे;
मय तुके धन-धन भेंट चेगायंदे।
13 कसनबलले तुय मोचो जीव के मोरना ले बचालीस,
आउर तुय मोचो पांयमन के फिसलतो ले बचालीस,
कि मोके, महापरभु चो पुरे
जीवन चो उजर ने चलुक होओ।