धोका देउमन के सत्यानास करतो काजे दाउद चो गुहार
बजनेया मुखिया काजे तार बाजा संगे दाउद चो मसकिल
55
ए महापरभु, कान डेरुन मोचो पारथना सुन;मोचो गुहार के पाटसुना नी कर।
2 मोचो बाटे धियान देउन मोके साका हो;
मय खुबे डाहाल-बिकाल होयंसे।
3 कसनबलले मोचो बयरीमन कोलार होयसोत, दुसटमन उबढंगरी बुता करसोत,
हुनमन मोके बदी देयसोत,
आउर रीस होउन मोके डाटा-टेवा करसोत।
4 मोचो मन, भीतरे-भीतरे खुबे बिपती ने कंदरेसे,
आउर मोके मोरना चो डर चेपालीसे।
5 मय डर काजे थरथरेंसे,
आउर खुबे डर ले मोके सीत-काटा मारली।
6 तेबे मय बलले: मोके परेंया असन पाटकी रले नंगत होती,
मय खुबे दूर उड़ुन जाते आउर अस्तिर ने रते।
7 दखा, मय उड़ुन खुबे दूर जाते,
आउर चिमचामनाय जगा ने बसापत करते। निनास
8 बड़े भारी लेहरा-धुका ले बाचतो काजे
मय झटके मोचो लुकतो ठान ने जाते।
9 ए परभु, हुनमन चो उआट के सत्यानास कर, हुनमन चो भासा-बोली के भुलकाव,
कसनबलले मय सहर ने उबढंगरी बुता आउर लड़ई-झगड़ा चे दखेंसे।
10 हुनमन रात-मंजन हुता चो भाड़ा उपरे
बुलते रयसोत;
आउर हुन सहर ने दुसट आउर उबढंगरी बुता करसोत;
11 दुसट बुता ले हुन सहर सत्यानास होयसे,
हुता चो खोरमन ने झीका-उड़मा आउर कपट बुता होयसे।
12 मोके बदी देतो बीता मोचो बयरी नोआय,
नोहले मय सहते,
मोचो बिरुद गुमान करु बीता बले मोचो बयरी नोआय,
नोहले मय हुनचो ले लुकते।
13 मानतर हुन तो मोचो संगवारी,
मोचो बाट-दखाउ आउर मोचो लोग-बाग आय।
14 आमी गोटोक-दुसर संगे कितलो मया ले गोटेयाते रलु,
आमी लोग-कुड़ा संगे-संगे महापरभु चो मंदिर ने जाते रलु।
15 हुनमन उपड़ता मोरोत,
हुनमन जीव रउ-रउ पतालपुर ने जाओत
कसनबलले हुनमन चो घर आउर मन ने अडरा बिचार भोरलीसे।
16 मानतर मय महापरभु के गुहारेंदे,
आउर जहोवा मोके बचायदे।
17 मय बियाने, मुंडे बेरा आउर सांज बेरा कहरुन-कहरुन गुहारते रयंदे,
आउर हुन मोचो गुहार सुनेदे।
18 हुन, मोचो बिरुद लड़ई करतो लोग ले मोचो जीव बचाउन अस्तिर करलो,
कसनबलले मोचो ले लड़ई करलो लोग तो खुबे आसोत।
19 महापरभु मूर ले महाराजा आय,
हुन सुनेदे आउर हुनमन के डंड देयदे।
कसनबलले हुनमन चो मन मुरे नी बदले,
आउर हुनमन महापरभु के मुरे नी डरोत। निनास
20 हुन आपलो मीतमन उपरे हाथ उठालो
आउर आपलो बायदा टुटालो।
21 हुनचो गोटेयातोर घींव ले आगर गुलगुला रये,
मानतर हुनचो मने लड़ई-झगड़ा चो बिचार रये,
हुनचो गोट तेल ले बले आगर कोंवल लागते रये,
मानतर हुनचो गोट निसलो खांडा असन रली।
22 आपलो बोजा जहोवा के सोपुन देस,
हुन तुके समालेदे,
हुन धरमकारी लोग के केबई घसरुक नी देये।
23 मानतर ए महापरभु, तुय हुनमन के सत्यानास चो खोदरा ने घसराउन देसे।
माने मारा आउर धोका देउ आपलो आधा उमर बले जीउक नी सकदे,
मानतर मय तुचो उपरे अमदेया भोरसा करेंदे।