पाप खेमा काजे पारथना
बजनेया मुखिया काजे दाउद चो भजन-गीत, बतसेबा संगे दाउद बेबिचार करलो किरता अगमजानी नातान हुनचो लगे एउ रये।
51
ए महापरभु, आपलो सत-मया लेमोचो उपरे दया कर,
आउर आपलो खुबे दया ले
मोचो करलो पापमन के भूलक आउर मोके खेमा कर*।
2 मोचो ओधरम ले मोके नंगत ले धो,
आउर मोचो पाप ले मोके सुद कर।
3 कसनबलले मय मोचो पापमन के जानेंसे,
मोचो पाप अमदेया मोचो पुरे रयसे।
4 मय तुचेई बिरुद पाप करलेसे,
आउर जोन तुचो नंजर ने अडरा आय, हुनकेई करलेसे,
एईकाजे तुचो फासला धारनिक,
आउर तुचो नियाव दोख नोहलो आय।
5 दख, ओधरम संगे मय आया चो पेट ने रले,
आउर जनमते खन ले मय पापी आंय।
6 तुय, सत मन चो लोग ले ची हरिक होउआस;
एईकाजे मोचो मन ने गियान सिखासे।
7 जुफा ले मोके सुद कर, मय पवितर होयंदे;
मोके धोउन सुद कर, तेबे मय गोरस असन पंडरा होयंदे।
8 मोके हरिक-उदीम चो गोटमन सुनुक होओ;
जेचोले तुचो टुटालो हाड़ामन ने सकत एओ।
9 मोचो पापमन बाटे तुय नी दख,
आउर मोचो करलो सपाय ओधरम बुता के भूलक आउर मोके खेमा कर।
10 ए महापरभु, मोचो भीतरे सुद मन उपजाव,
आउर मोके नवा आउर सत आत्मा देस।
11 मोके आपलो पुरे ले नी निकराव,
आउर आपलो पवितर आत्मा के मोचो ले नी गुचाव।
12 तुचो करलो मुक्ति चो हरिक मोके फेर देस,
आउर तुचो बचन के मानतो आत्मा देउन मोके समाल।
13 तेबे मय ओधरमीमन के तुचो बाट दखायंदे,
आउर पापीमन तुचो बाटे बोहड़दे।
14 ए महापरभु, ए मोके मुक्ति देउ महापरभु,
मोके माने-मारा पाप ले छंडाव,
तेबे मय तुचो दिलो छंडावा काजे जय-जय गीत गायंदे।
15 ए परभु, मोचो जीब के खेलाव,
तेबे मोचो टोंड ले मय तुचो गुन गाउक सकेंदे।
16 कसनबलले तुय सोजे जतरा ले हरिक नी होयीस,
तुय होम-जतरा ले बले हरिक नी होयीस, नोहले मय जतरा चेगाते।
17 खिसियातो मन महापरभु के भावतो लाईक जतरा आय;
ए महापरभु, खिसियातो आउर पसतातो लोग के तुय पाट नी करीस।
18 हरिक होउन सियोन चो भलई कर;
आउर जरूसलेम चो भाड़ा के बनाव,
19 तेबे तुय धारनिक जतरा ले हरिक होसे,
बललोने, समपुरन होम-जतरा ले;
तेबे तुचो बेदी ने जुवान संडमन चो जतरा चेगादे।