सत आराधना
आसाप चो भजन-गीत
50
सबु ले सकत महापरभु जहोवा हुकुम देयसे,बेर उदिया बाटले धरुन बेर बुड़ती बाटले
मंजपुर चो लोगमन के हुन हागदेयसे।
2 समपुरन सुंदर सियोन डोंगरी ले
महापरभु चो मयमा, उजर असन बरेसे।
3 आमचो महापरभु एयसे आउर ओगाय नी रये,
हुनचो पुरे-पुरे आईग लाकड़ी उलटाते जायसे,
हुनचो भोंवरक लेहरा-धुका आसे।
4 हुन आपलो रयत चो नियाव करतो काजे
उपरपुर आउर मंजपुर के हागदेयसे:
5 “जतरा चेगाउन मोचो ले बायदा करलो
मोचो भगतमन के मोचो लगे रूंडाहा!”
6 उपरपुर हुनचो धारनिक चो बारे ने सांगेसे,
कसनबलले महापरभु खुदे नियाव करु आय। निनास
7 “ए मोचो रयत, मोचो गोट के सुन,
ए इसराएल, मय तुचो बिरुद गवई देयंसे,
महापरभु, तुचो महापरभु मय ची आंय।
8 तुचो जतरामन काजे मय तुके बदी नी देयंसे,
तुय तो मोचो काजे रोजे होम-जतरा चेगायसीस।
9 मोके तुचो थानो गाय-गोहड़ी ले बयला,
आउर तुचो कोटा ले बोकड़ामन नी लागे।
10 कसनबलले रान चो सपाय जनावरमन,
आउर कोटी-कोटी डोंगरीमन चो पसुमन मोचेई आत।
11 बादरी चो सपाय चड़ईमन* के मय जानें,
आउर भाटा ने बुलतो सपाय जनावरमन मोचेई आत।
12 मोके भूक लागलोने मय तुके नी सांगते,
कसनबलले संवसार आउर जोन बले हुता आसे सपाय मोचेई आय।
13 काय, मय बयलामन चो मास खाउआंय,
नोहले बोकड़ामन चो लोउ खाउआंय?
14 महापरभु के धन-धन भेंट* चेगाव,
आउर सबुले बड़े महापरभु के आपलो बोअलो बोदना चेगाव।
15 बिपती बेरा मोके हागदेस,
मय तुके छंडायंदे आउर तुय मोचो मयमा करसे।”
16 मानतर महापरभु दुसट के बलेसे:
“काय हक ले, तुय मोचो नियममन के सुनायसीस,
आउर मोचो बायदामन चो बारे ने गोटेयायसीस?
17 तुय तो मोचो सिखिया के बईर करसीस,
आउर मोचो बचनमन के हेला समजसीस।
18 चोर के दखुन तुय हुनचो संगे रउक मन करसीस,
आउर बेबिचारीमन संगे रयसीस।”
19 “तुचो टोंड ले अडरा गोटमन गोटेयायसीस,
तुचो जीब ले कपट गोट घड़सीस।
20 तुय बसुन भाई चो बिरुद गोटेयाते रयसीस,
आउर आपलो भाई चो खुद खायसीस।
21 तुय असन बुता करलो के मय ओगाय रले,
एईकाजे तुय समजलीस कि मय बले तुचेई असन आंय।
मानतर मय तुके समजायंदे, आउर तुचो करलो सपाय बुता के तुचो आंईक पुरे दखायंदे।”
22 “महापरभु के भुलकतो लोग, ए गोट के नंगत ले जाना,
नोहले मय तुमके सत्यानास करेंदे, आउर तुमके कोनी छंडातो लोग नी रदे।
23 जोन बले धन-धन जतरा चेगायसे हुन मोचो मयमा करेसे,
जेचो चलनी-बुलनी नंगत आसे,
हुन महापरभु बाटले मुक्ति पायदे।”