धन-माल चो भोरसा ने नी राहा
बजनेया मुखिया काजे कोरह थर चो भजन-गीत
49
ए देस्-देस् चो सपाय लोग, ए गोट के सुना;ए संवसार ने रतो सपाय लोग धियान ले सुना,
2 बड़े-नानी,
सवकार-गरीब, सपाय लोग सुना।
3 मय गियान चो गोटमन सांगेंदे;
मोचो मन चो गोट समजतो लाईक आसे।
4 मय नीती-बचन के धियान ले सुनेंदे;
मय सारंगी बजाउन-बजाउन हुनचो भेद के समजायंदे।
5-6 दुसटमन आपलो धन-माल उपरे भोरसा करसोत
आउर आपलो खुबे धन-माल किरता गुमान करसोत,
हुनमन ओधरम ले मोके भोंवरक छेकलो बेरा,
आउर बिपती ने पड़लो बेरा मय काय काजे डरुआंय?
7 सते, हुनमन ले कोनी बले आपलो भाई चो जीव बचाउक नी सकदे,
आउर हुनचो जीव चो पलटा महापरभु के काई देउक नी सकदे।
8 कसनबलले जीव खुबे मोल चो आय,
आउर हुनचो मोल के कोनी केबई चुकाउक नी सकोत।
9 असन कोनी नीआय जोन अमदेया जीव रयदे
आउर केबई नी मोरे।
10 कसनबलले आमी दखुंसे कि बुद बीतामन बले मोरसोत;
भकवामन आउर मूरकमन बले मोरसोत
आउर आपलो सपाय धन-माल दुसर काजे छांडुन जायसोत।
11 हुनमन मने-मन बिचारसोत, हुनमन चो घर-बार अमदेया रयदे,
आउर हुनमन चो रतो ठान पीड़ी-पीड़ी ले रयदे,
एईकाजे हुनमन भुंय-बाड़ी के आपलो नाव ने करसोत।
12 मानतर मनुक चो मान-पन अमदेया नी रये;
हुन मोरुन सरतो जनावरमन असन आय।
13 मूरकमन चो जीवना असने चे आय,
आउर आपलो उपरे भोरसा करतो लोग बले असने होदे। निनास
14 हुनमन बले छेरी-मेंडीमन असन मोरुन माटी ने मिसुन जादे;
मोरना हुनमन चो धोरई आय;
बियान पावते खन सोज लोग हुनमन उपरे राज करदे,
हुनमन चो रुप नास होउन जायदे;
आउर पतालपुर हुनमन चो रतो ठान होयदे।
15 मानतर महापरभु मोचो जीव के पतालपुर चो हक ले बचायदे,
कसनबलले हुनी मोके आपलो संगे नेयदे। निनास
16 कोनी मनुक सवकार होलोने,
आउर हुनचो घर चो इजित-मान बाड़लोने तुय नी डर।
17 कसनबलले हुन मोरलोने काई के आपलो संगे नी नेये;
हुनचो धन-माल हुनचो संगे मोठ ने नी जाए।
18 हुन जीवता जीव भर आपलो बड़ाई करले बले—
आउर धन-माल बाड़लो बेरा, लोग हुनचो बड़ाई करले बले—
19 हुन आपलो पुरखामन असन मोरुन जायदे,
आउर केबई उजर नी दखेदे।
20 सवकार मनुक के कितलेई मान-पन मिरले बले हुनके गियान नीआय जाले
हुन नास होतो जनावर कटार आय।