महापरभु चो सहर, सियोन
कोरह बंस चो भजन-गीत
48
आमचो महापरभु चो सहर ने आउर पवितर डोंगरी नेजहोवा सबुले बड़े आउर खुबे जय-जय करतो लाईक आय।
आउर गुलाय मंजपुर चो हरिक आय,
महाराजा चो सहर,
सियोन डोंगरी, बेर उदिया डेबरी बाटे आसे।
3 हुन सहर काजे
महापरभु डेंग भाड़ा आय।
4 दखा, राजामन आउर सेनामन जुहा होला,
हुनमन गोटकी होउन सियोन चो बिरुद ने जुद करुक निकरला।
5 महापरभु चो सहर, सियोन के दखते खन हुनमन खुबे भक्याला;
आउर डरुन हापापूती पराला;
6-7 जसन तरसीस चो पानी-जाहाजमन के
बेर उदिया बाटले बोहतो लेहरा रन-बन करुआय
आउर जसन छर-फर होतो बेरा बायले के दुखा उठुआय,
उसने हुता हुनमन के डर चेपाली।
8 सेनामन चो जहोवा चो सहर ने,
आमचो महापरभु चो सहर ने,
जसन आमी सुनुन रलु, उसने दखलुसे बले,
महापरभु हुनके अमदेया चमकट संगायदे। निनास
9 ए महापरभु, आमी तुचो मंदिर भीतरे
तुचो सत-मया के सूरता करुंसे।
10 ए महापरभु, जसन तुचो नाव बड़े आय,
उसने गुलाय मंजपुर ने तुचो जय-जय होयसे।
तुचो उजा हाथ, धरम ले भोरलीसे।
11 तुचो सत-नियाव किरता
सियोन डोंगरी हरिक होओ
आउर जहूदा सहर चो लोगमन हरिक-उदीम ने रओत।
12 सियोन सहर चो भोंवरक हिंडा आउर हुनचो भोंवरक किंदरा,
हुनचो गुबामन के गनुन दखा,
13 हुनचो राज-भाड़ा के धियान ले दखा;
हुनचो माहालमन चो भोंवरक हिंडा,
जेचोले तुमी एतो पीड़ी के ए गोटमन सांगुक सकासे
14 कि ए महापरभु
अमदेया काजे आमचो महापरभु आय।
आमचो जीवता-जीव भर हुन आमके बाट दखायदे।