दया आउर नियाव करु महापरभु
बजनेया मुखिया काजे मसकिल दीस * ने दाउद चो भजन-गीत, जिदलदांय एदोमी दोएग एउन साउल के सांगलो, “दाउद, अबीमेलेक घरे आसे।”
52
ए बीर, महापरभु चो लोगमन के डाटा-टेवा करतो ले तुय काय काजे गुमान करसीस?महापरभु चो सत-मया तो अमदेया काजे आय।
2 तुय सत्यानास करतो उआट बनायसीस,
तुचो जीब निसलो छूरा असन आय, तुय कपट बुतामन ची करसीस।
3 तुय भलई ले आगर अडरा के,
आउर सत ले आगर फंद के मन करसीस। निनास
4 ए कपटी जीब,
तुय सत्यानास करतो सपाय गोटमन ले हरिक होउआस।
5 मानतर महापरभु तुके अमदेया काजे नास करेदे;
हुन तुके, तुचो रतो ठान ले निकरायदे;
आउर जीवतमन चो संवसार ले तुके उखनुन पकायदे। निनास
6 तेबे धरमकारी लोग एके दखुन भक्यादे,
आउर असन बलते हुन कपटी के हांसुन पकादे,
7 “दखा, ए हुनी मनुक आय,
जोन महापरभु चो सरन ने एउक मन नी करलो,
मानतर आपलो खुबे धन-माल उपरे भोरसा करलो,
आउर खुद दुसट बुता ने चमकट होते गेलो!”
8 मानतर मय तो महापरभु घरे
काचा जयतून रूक असन आंसे।
मय महापरभु चो सत-मया उपरे
अमदेया भोरसा करेंसे।
9 तुय ए बुता के करलिसीस,
एईकाजे मय अमदेया तुचो धन-धन करते रयंदे।
पवितर लोगमन चो मंजी तुचो नाव चो जय-जय करेंदे,
कसनबलले ए खुबे नंगत आय।