आमके रखेया करु महापरभु
बजनेया मुखिया काजे कोरह बंस चो “अलामोत दीस” ने गीत
46
महापरभु आमके सरन देउ आउर आमचो सकत आय,बिपती बेरा परभु आमचो लगे रउन आमके साका होउ आय।
2 एईकाजे आमी नी डरूं, भले मंजपुर उलटो,
नोहले डोंगरीमन गड़िया समदूर ने घसरोत;
3 नोहले समदूर गरजो आउर फेफल छांडो,
नोहले डोंगरीमन हुनचो बड़े-बड़े हलकामन ले थरथरोत। निनास
4 गोटोक नंदी आसे, जेचो नाहार महापरभु चो सहर के
बललोने, सबुले बड़े महापरभु चो पवितर ठान के हरिक करेसे।
5 महापरभु हुन सहर चो मंजिगता आसे, बियान पावते खन महापरभु हुनके साका होयसे;
हुन सहर अमदेया चमकट रयदे।
6 जात-जात चो लोगमन ने चिड़ली-छांडली, राज-राज दल-दलली,
हुनचो राग सुनुन मंजपुर उतली।
7 सेनामन चो जहोवा आमचो संगे आसे,
जाकूब चो महापरभु आमचो रखेया करु डेंग भाड़ा आय। निनास
8 इआ, जहोवा चो बड़े-बड़े बुतामन के दखा,
हुन मंजपुर के कसन करलोसे।
9 हुन, गुलाय मंजपुर चो लड़ईमन के ठेबायसे;
धनु के टुटायसे, भाला के दुय गोंदा करेसे
आउर रथमन के आईग ने डसायसे।
10 “ओगाय राहा आउर जाना कि मय ची महापरभु आंय!
जात-जात ने मय ची माहान आंय,
गुलाय मंजपुर ने मय ची माहान आंय।”
11 सेनामन चो जहोवा आमचो संगे आसे,
जाकूब चो महापरभु आमचो रखेया करु डेंग भाड़ा आय। निनास