भजन गीत 45

राजा काजे बिया गीत

बजनेया मुखिया काजे सोसनीम ^*दीस ने कोरह बंस चो मया गीत

मोचो मन राजा काजे सुंदर-सुंदर बिचारमन ले हरिक-उदीम होयसे;

ए गीत मय राजा काजे बनालेसे;

आउर मोचो जीब, सिद लिखियार चो लिखनी-काड़ी असन आय।

2 तुय मनुक चो बेटामन ने सबुले सुंदर आसीस,

तुचो गोट ने खुबे दया आसे,

एईकाजे महापरभु तुके जुग-जुग काजे बर दिलोसे।

3 ए बीर, तुय आपलो खांडा के आपलो करांडे बांध,

जोन तुचो मयमा आउर उजर आय।

4 सत, सोज आउर धरम के जीतातो काजे

तुय आपलो मयमा ने पुरे जा;

तुचो उजा हाथ डरतो लाईक बुतामन तुके सिखाओ।

5 तुचो कांडमन गोजेया आसे

हुनमन राजा चो बयरीमन चो कारजा-बोवरामन के छिंगड़ेसे;

देस्-देस् चो लोग तुचो पुरे घसरेसोत।

6 ए महापरभु, तुचो राजगादी जुग-जुग रयदे।

तुचो राजगुबा सत-नियाव चो आय;

7 तुय तो धरम के मया आउर ओधरम के बईर करुआस।

एईकाजे महापरभु, तुचो महापरभु, तुचो मुंडे हरिक चो तेल ले अबिसेक करुन

तुके, तुचो संगवारीमन ले बड़े बनालो;

8 तुचो सपाय फटई गंदरस, धूप आउर बास तेल ले मंग-मंग बास देयसे,

हाथी-दात चो माहालमन ने तार बीती बाजा बजालो किरता तुय हरिक होलीस;

9 तुचो ले मान पावलो बायलेमन ने कोनी-कोनी राज-कुंआरीमन आत;

तुचो उजा बाटे, ओपीर राज^* चो सोन^† ले सजारी होउन रानी उबलीसे।

10 ए रानी सुन, धियान देस आउर कान डेरुन सुन;

आपलो लोग-बाग के आउर आपलो आया-बुआ चो घर के भूलक,

11 तेबे राजा तुचो सुंदर रंग-रुप के मन करेदे।

हुन तुचो मालिक आय, एईकाजे तुय हुनके इजित-मान कर;

12 सोर सहर^* चो लोगमन भेंट धरुन एदे,

आउर हुता चो सवकारमन भेंट देउन तुचो मन जीतुक खोजदे।

13 रानी आपलो माहाल ने खुबे सुंदर दखा देयसे, हुन सोन गुथलो फटई के पींदलीसे;

14 हुनके रंग-रंग चो मल-मल फटई पींदाउन राजा लगे अमराउन देदे;

हुनचो संगे रतो कुंआरी लेकीमन बले हुनचो पाट-पाट एदे।

15 हुनमन के हरिक-उदीम ले अमराउन देदे

हुनमन राजा चो माहाल ने ओलदे।

16 तुचो बाप-दादी चो ठान के तुचो बेटामन धरदे;

जोनमन के तुय गुलाय मंजपुर चो राजपालमन बनासे।

17 मय असन करेंदे कि लोगमन पीड़ी-पीड़ी ले तुचो नाव धरदे;

एईकाजे देस्-देस् चो लोग जुग-जुग काजे तुचो बड़ाई करते रदे।