धरमकारीमन चो रखेया करु जहोवा
दाउद चो भजन-गीत
37
दुसट लोग किरता फिकिर नी कर;कपट बुता करुमन ले ईरका नी हो,†
2 कसनबलले हुनमन रोंडा असन झटके सुकुन जादे,
आउर लस-लसा बुटामन असन झटके झुरा होदे।
3 जहोवा उपरे भोरसा कर, आउर भलई कर;
तेबे बसापत करलो देस् ने, अस्तिर ने रसे।
4 जहोवा चो लय ने रा,
आउर हुन तुचो मन-इछा के पुरा करेदे।
5 आपलो सपाय उआट के जहोवा उपरे छांड;
आउर हुनचो उपरे भोरसा कर, हुनी तुके साका होयदे।
6 हुन तुचो धारनिक के उजर असन,
आउर तुचो सत के मुंडे बेरा चो घाम असन बरायदे।
7 जहोवा उपरे भोरसा करुन धीरजा ले हुनचो बाट दखते रा;
कोनी बाड़ती करतोके दखुन मुरमुरा नी हो,
आउर अडरा उआट ले बाड़ती करुमन के दखुन फिकिर नी कर।
8 रीस नी हो, आउर रीसाहा होउक छांडुन देस।
रीस ले अडरा ची होयसे।
9 कसनबलले अडरा बुता करुमन नास होदे,
मानतर जहोवा चो बाट दखतो लोग देस् चो हकदार होदे।
10 खिंडिक समया पाछे, गोटोक बले दुसट नी रदे;
आउर तुय हुनमन के गुलाय गांव नंगत ले डगराले बले, हुनमन के नी भेटसे।
11 मानतर सोज लोग देस् चो हकदार होदे,†
आउर खुबे अस्तिर किरता हरिक-उदीम ने रदे।
12 धरमकारीमन चो बिरुद ने दुसट लोग अडरा उआट करसोत,
आउर रीस ले दात कडरेसोत;
13 मानतर परभु हुनमन उपरे हांसेदे,
कसनबलले हुन, हुनमन उपरे एतो डंड के दखेसे।
14 गरीब-दुखीमन के खुबे नानागती करतो काजे
आउर सोज लोगमन के मोरते मारतो काजे
दुसटमन खांडा निकरालासे आउर धनु-कांड झोकेयालासे;
15 हुनमन चो खांडा, हुनीमन चो कारजा भेदेदे,
आउर हुनमन चो धनु-कांड गोंदा-गोंदा होयदे।
16 धरमकारीमन चो खिंडिक असन धन
दुसटमन चो खुबे धन-माल ले नंगत आय।
17 कसनबलले दुसटमन चो बांहामन के टुटादे,
मानतर जहोवा, धरमकारीमन के समालेदे।
18 सोज लोग चो जीवना के जहोवा जानेसे,
हुनमन चो बाटा अमदेया काजे रयदे;
19 बिपती बेरा हुनमन लाज नी पड़दे,
आउर भूक पड़लो बेरा हुनमन लगे पुरत ले खादी-पीदी रयदे।
20 मानतर दुसटमन नास होदे,
जहोवा चो बयरीमन भाटा चो रोंडा असन सुकदे;
आउर कुमला असन उड़ुन जादे।
21 दुसट, लागा मांगुन नी बोहड़ाये,
मानतर धरमकारी हरिक मन ले दान देयसे;
22 जोनमन जहोवा ले बर पायसोत हुनमन मंजपुर चो हकदार होदे,
मानतर जोनमन हुनचो ले सराप पायसोत हुनमन नास होदे।
23 सोज मनुक चो डांहका के जहोवा समालेसे,
आउर हुनचो चलनी-बुलनी ले हरिक होयसे;
24 हुन घसरलोने बले काई नी होये,
कसनबलले जहोवा हुनचो हाथ धरुन बचायसे।
25 मय जुवान रले, एदांय डोकरा होलेसे,
मानतर केबई बले धरमकारी के साका नोहलोर रतोके
आउर हुनचो पिला-झीलामन मुटी मांगतोके नी दखलेसे।
26 हुन रोजे-दिना हरिक मन ले दान देयसे,
आउर हुनचो पिला-झीलामन बले बर पायसोत।
27 अडरा बुता के छांडुन भलई कर;
तेबे तुय महापरभु बायदा करलो देस् ने जुग-जुग रसे।
28 जहोवा सत-नियाव के मन करुआय;
हुन आपलो पवितर लोगमन के केबई नी छांडे।
हुनमन के अमदेया रखेया करेदे,
मानतर दुसटमन चो बंस के बुड़ायदे।
29 धरमकारीमन मंजपुर चो हकदार होदे,
आउर हुता, जुग-जुग काजे बसापत करदे।
30 धरमकारी टोंड ले गियान चो गोट गोटेयाउआय,
आउर हुनचो जीब सत-फासला सुनाउआय।
31 आपलो महापरभु चो नियम-कानुन हुनचो मने आसे;
आउर हुनचो पांय केबई नी फिसले।
32 दुसट, धरमकारीमन के मारतो घत ने रयसे,
आउर हुनमन के मोरते मारतो उआट करेसे।
33 जहोवा हुनके, हुनचो हक ने नी छांडे,
आउर हुनचो नियाव-दाव बेरा हुनके दोसी नी माने।
34 जहोवा उपरे भोरसा कर, आउर हुनचेई बाट दखते रा,
तेबे हुन, तुचो बाड़ती करुन तुके मंजपुर चो हकदार बनायदे;
आउर तुय दुसटमन नास होतोके दखसे।
35 जसन गोटोक काचा रूक खतउ भुंये लस-लसा बाड़ुआय,
उसने मय दुसट के खुबे सकत पाउन बाड़तोके दखले।
36 जिदलदांय मय हुन बाटले फेर गेले तेबे हुता कोनी नी रला;
मय हुनके धियान ले डगराले, मानतर हुनके कहांय भेटुक नी होली।
37 दोख नोहलो मनुक के धियान देस, आउर सोज मनुक के दख,
कसनबलले मिलुन-मिसुन रउमन अस्तिर पावदे।
38 मानतर सपाय ओधरमीमन नास होदे;
आउर दुसटमन सत्यानास होउन जादे।
39 धरमकारीमन चो मुक्ति जहोवा बाटले होयसे;
बिपती बेरा हुन, हुनमन चो चमकट भाड़ा आय।
40 जहोवा, हुनमन के साका होउन बचायसे;
आउर हुन, हुनमन के दुसटमन ले छंडाउन रखेया करेसे,
कसनबलले हुनमन, हुनचो सरन ने ईलासोत।